Read Uab Meto AYUB 32 Bible Online

AYUB 32 - Uab Meto bible

AYUB 32

¹Natuin Nai Ayub nafek neu in namneo, es nanet in soba sin teun sin kan lomi fa he natae in anten.

²Mes anbi nane anmu'i atoni mese kanan Nai Elihu le Nai Barakheel, sufa ka'uf na'ko Nai Bus na'ko uf Ram. In ka nalan nabe'i fa in to'as, natuin Nai Ayub namneob in aon ma nasan Uisneno.

³In nato'an Nai Ayub in benuf sin teun sin, natuin sin kan suli fa Nai Ayub in uab, maski nak In nasanab.

⁴Nai Elihu in munif na'ko sin, es nanet in anpao talantia sin nauab nalalin.

⁵Leka in nit nak sin ka natae nabe'i fa, in nato',

⁶ma in nauab nak, “Au fe munif kau, ma hi mimnasi mnesin kau, es nanet au umtau, neu he utiab ki au uab.

⁷Anbi au tenab, hi mes es he miuab, le namnasi nesi mes es hen bati in nek hine.

⁸Mes le anfe nek hine nane neu mansian, al Uisneno In Smanan Akuasat Afin-finit.

⁹Atoni anfani ahinet ka natuin fa in ua mnanu; atoni nahin mo'et amneot ka natuin fa in namnasi.

¹⁰Es nanet mitnin kau, mifetin kau he au upoitan au tenab.

¹¹Nok nek anone au utnin ki leka hi miuab, ma au pao ki leka hi mami uab halinat.

¹²Au panat ki ma utnin ki leka hi mitef mok nukat. Nai Ayub ansan anbi in uab mes hi ka mitonan fa.

¹³Moe onme es hi mak hi mitef milali mok nek ahinet, natuin hi milelbom ma mina'tom. Ataes neu Nai Ayub alkun Uisneno.

¹⁴Nai Ayub nauab neu ki, ma ka neu kau fa, ma au mes ka utae fa on hi.

¹⁵Nai Ayub, sin nekan nas'unu ma ka natae ko fa; sin mes ka naton nit ko fa sa' es.

¹⁶Sin al anhake, sin ka nauab anteni fa. Au mes he pao sin ka, maski nak sin ka nauab fa ka?

¹⁷Kahaf, tabu le i au mes utae ko; au mes uton ko au tenab.

¹⁸Au ka alan ube'i fa he nati' au pao, ma au ka pao teni au uab sin.

¹⁹Leka au ta', au mes a'pe', on alu le nahenu nok tua min kase fe'u.

²⁰Au mes upoitan au uab, he nati' au nekak anmalin; au mes a'fai au fefak he nati' au utae.

²¹Au mes ka pesi fa sekau amsa anbi matoes le i, ma kan mu'i fa atoni mese amsa he nati' au pules in.

²²He nati' tatuna es amsa au ka uhin fa, ma leka au mo'e ani, Uisneno mes ankas kau.