Read Uab Meto AYUB 33 Bible Online

AYUB 33 - Uab Meto bible

AYUB 33

¹Tabu le i Nai Ayub, mutnin lek-leko au uab sin, le au he uteb ani sin.

²Au uloitan ulali he nati' au u'uab.

³Nok nek muti au u'uab; au he uton ko nok amneot.

⁴Nok Uisneno In Smanan knino In anmo'e kau ma anfe neu kau honis.

⁵Es nanet, kalu nabe'i ho mutae kau nai. Muloitan ho uab sin.

⁶Anbi Uisneno, ho ma au ka ta sulif, natuin anmo'e kit na'ko auf makli'at.

⁷Es nanet kais ho mumtausan kau natuin au ka ami fa he umofu ko.

⁸Au nen ulali sa' le ho muton mulali, ma au uhin sa' le hom sali.

⁹Ho mak, ‘Au knino kau, au ka teli san fa ma au ka mo'e fa sanat.

¹⁰Mes Uisneno nami lanan hen laban kau, ma In anmo'e kau fani on In musu.

¹¹In antao kolen besi anbi au haek, ma In anpanat au bekok.’

¹²Hoi Nai Ayub, ho tenab nane ansan! Natuin Uisneno nane In naek ma nesin mansian.

¹³Nansa' es ho mak Uisneno In ka nen fa mansian in sakoit?

¹⁴Uisneno nauab neu mansian neki ale lanan, mes kan mu'i fa atoni mese le anpanat In uab.

¹⁵Leka anbi fai mansian antup anfin, Uisneno nauab nao mnitas ma nunmait.

¹⁶Uisneno anlenu sin natninan; In naskekeb sin neki uab palolit.

¹⁷Salit he nati' sin nas-nas na'ko sanat, ma nasaitan sin neka naeb.

¹⁸In ka nafetin fa sin he namle'un, mes In anpanat sin na'ko maten.

¹⁹Uisneno nabokan atoni neki menas, talantia in aon nahenu nok menas.

²⁰Amenat kan lomi fa he nah, mnahat le min le'uf neki haep saet.

²¹In aon anmeto anmate, ma in nuif sin natonok.

²²Ala kle'ot in tabu namsopu ma in haumakbon neu nate naukel.

²³Oin mese na'ko ahake Uisneno nifun mese es namnauba mansian neu in mepu, ma mes nem ma antuntaku in.

²⁴Nok nek nu'ut ahake neno nane nak, ‘Mifetin in, he kais in antam neu nopu maten. I noni he masoi, he nati' nafetin in anten.’

²⁵In aon mes namep ma namlia onle atoni munif.

²⁶Leka in an onen, Uisneno mes anen ma anek in, es nanet in nanaeb Uisneno nok malinat ma Uisneno mes anpaloli in monin.

²⁷Ma anbi atoni amfaun in mes nak, ‘Amle'ut au ak leko, es nanet au sanat anaek, mes Uisneno kan kas kau fa.’

²⁸Uisneno nafetin kau na'ko nopu maten, es nanet au fe moni antia tabu le i.

²⁹Uisneno anmo'e lasi nane teni-teni,

³⁰he nati' anfe honis neu mansian ma anfe malinat anbi in monin.

³¹Es nanet mutnin Nai Ayub, amtahan ho lukem, amta' nai, tabu le i au es he u'uab.

³²Mes kalu anmu'i sa' le ho he muton muab nai, ma leka ho mumneo, au mes utuin ko.

³³Mes kalu kahaf, amta' nai ma mutuin kau, au he unoina alekot neu ko.