Read Uab Meto AYUB 34 Bible Online

AYUB 34 - Uab Meto bible

AYUB 34

¹Ai ho ka ahinet ma nek leko ko fa? Es nanet mutuin au uab sin le i.

³Atoni nahin neu mnahat nane namin leka in antamis nani, ma uab alekot in natnin nani.

⁴Lasi le i so hit atae lek-leko, nalali te ala kit bua-bua tami in lanan.

⁵Nai Ayub nak, ‘Au ka mu'i fa sanat, mes Uisneno ka naton fa amneot nane neu kau.

⁶Au fani on apoiba, natuin au uton neu au ka usanab fa. Tabu le i au upap mafena, maski au ka usanab fa.’

⁷Ai hi mit atoni onle Nai Ayub le i? In nale'uf Uisneno teni-teni.

⁸In anlomi he nati' anmo'e soba nok atoni-atoni amle'ut ma nabua nok atoni abulalut.

⁹In nauab nak, ka maupa fa leka in he nanaoba Uisneno In lomin.

¹⁰Hoi atoni-atoni ahinet mitnin nai! Oin Uisneno Akuasat Afin-finit nane anmo'e sanat?

¹¹In nanoina mansian namnes nok sa' le In anmo'e, ma In mo'e nani neune namnes nok in bekon.

¹²Uisneno Akuasat Afin-finit kan mo'e fa amle'ut; In anmo'e amneot neu ale atoni.

¹³Uisneno ansimo In kuasat nane na'ko sekau ka? Sekau es anlenu In hen panat pah pinan?

¹⁴Leka Uisneno naiti nani mansian in smanan, ma naiti nafani in smanan amonit,

¹⁵es nanet ale smanaf amonit mes anmate, ma mansian nane mes anfani afu on afi ahunut.

¹⁶Kalu ho ahinet ko, ampanat nai, amtahan ho lukem ma mutnin nai.

¹⁷Nansa' Uisneno amneot ma abe'it nane ho musan In? Ai ho mutenab mak Uisneno nato'an amneot?

¹⁸Uisneno ankas ale usif ma ana' plenat leka sin anmaufinu ma anmo'e amle'ut.

¹⁹In kan pesi nok fa usif sin, ai In kan lomi nesin fa atoni amu'it na'ko atoni amamu'it, natuin In es anmo'e nani sin al sin.

²⁰Sin mes anmate nok askeken anbi fai. Uisneno mes ankas ana plenat sin ma sin mes anmaten amsa, ma mes namate atoni abe'it nok.

²¹In anpanat mansian in monin. In mes ankiso sin bekot.

²²Kan mu'i fa mesokan, maski nak anbi fai, le na'tolo' atoni asanat.

²³Uisneno mes kan lek fa in tabu, he In nem ma anlefi mansian sin lasi.

²⁴In mes ka natan ma kan tae anteni In nasnasab ana' plenat ma naiti in aseka.

²⁵Natuin, In nahin sa' le sin anmo'e nalali; es nanet, In nasnasab ma naskuku sin anbi fai.

²⁶In antepo sin natuin sin sanat, ma In ankas sin anbi atoni amfaut sin matan.

²⁷Natuin, sin ka natuin fa In lomin, ma kan panat fa In plenat sin.

²⁸Sin anmo'e atoni amamu'it ansakoi, ma Uisneno In nen sin kulut kaet.

²⁹Leka Uisneno nafek he nati' sin anta', kan mu'i fa atoni mese nabe'i hen laban In. Leka In na'tolo' In human, kan mu'i fa es he natef nok In.

³⁰Ma uf-uf ka nabe'i fa he noes nani susu' na'ko ana' plenat amaufinut sin.

³¹Nai Ayub, hom au mulali ho sanat sin neu Uisneno? Ho maiti mulali supat he nati' kais ho mo'e amteni sanat?

³²Hom toti mulali Uisneno he nati' naton ko ho sanat sin ka? Ho mu sup on he musnas muko ho mo'et i ka?

³³Moe onme Uisneno mes nanokab ho salit sin, mes Uisneno In mo'et ho kam lomi hem simo fa? Tabu le i ho mes mufek ames kum. Nalali te mupoitan ho tenab!

³⁴Ale atoni ahinet sin mes anlomi nani; ma sin mes natuin au uab.

³⁵Nak Nai Ayub ka natenab fa he na in nauab es nanet in uab sin ka maota fa.

³⁶Kalu tatenab Nai Ayub in uab, sin lek-leko mes natonon neu in uab on atoni amaufinut.

³⁷In ansato anteni in sanat esle'; in anlaban Uisneno, ma in nale'uf In anbi hit matak.