Read Uab Meto AYUB 35 Bible Online

AYUB 35 - Uab Meto bible

AYUB 35

¹Nai Ayub, ho mutenab amsan leka ho mak anbi Uisneno In matan ho ka mu'i fa sanat.

³Ho mutenab amsan leka ho mutan, ho sanat nane in otan sa' neu In; ma in upan sa' le hom simo, leka ho ka mo'e fa sanat.

⁴Au mes a'fe ani han taes neu ko ma neu ho soba sin amsa.

⁵Muaiti ho matam neu neno tnanan ma amkiso nai ale nope nane mnaun le'uf kun.

⁶Leka ho musanab, ho mes anmo'e mani sa' neu In? Ma kalu ho elet ma tanhais sin namfau, ho mes anmo'e sa' neu In.

⁷Nok ho mo'et alekot ho kam fiti fa Uisneno. Namneo, In kan lomi fa hen simo sa' es na'ko ko.

⁸Al natuin ho sanat sin, hom tamni' ho aom bian sin. Hom fiti In amsa natuin ho mo'et alekot sin.

⁹Atoni-atoni le ho mususu' sin mes sin ansanane; sin anboin ma antoti hen tuntaku sin.

¹⁰Mes ka nen fa Uisneno, sin apakaet le anfe tuntakus leka sin nasusbok,

¹¹ma le anfe tenab alekot neu mansian nesin kolo ma mu'it anbi pah pinan.

¹²Atoni-atoni le nasusu' sin nane sin anbai mes Uisneno anta' natuin sin maufinu ma sin neka naeb.

¹³Sin anbai nok hana naek mes kan mu'i fa in otan; natuin Uisneno Akuasat Afin-finit kan kius fa sin ma ka nen fa sin.

¹⁴Nai Ayub, nes-nesi anteni leka ho mu'uab mak ho ka mit fa In, ma ho lasi antia In matan ma hom pao In.

¹⁵Oin ho mutenab mak Uisneno kan fe fa kasat ma kan tae fa ho elet ma tanhais sin.

¹⁶Ho mu'uab amteni in ka maota fa; ma namneo ho ka muhin fa sa' le ho mu'uab mani.