Read Uab Meto AYUB 36 Bible Online

AYUB 36 - Uab Meto bible

AYUB 36

¹Malan ma mutnin amteni, nok Uisneno In kanan, fe anmu'i anteni le au he uton ateni.

³Au pake hinet le meunuan ma naek nane, he uton nak Au Apakaet nane amneot kun.

⁴Au uab sin nane kan mu'i fa luman; atoni ahinet es ho matam.

⁵Uisneno nane abe'it ma amatanit. In nahin ale sa'. In ka na'baun fa atoni mese amsa.

⁶In ka nafetin fa atoni asanat he in moni lo, In naton In amneot neu atoni asusal sin.

⁷In anpanat atoni-atoni amneot, In anmo'e sin naplenat onle usif-usif, talantia nausi neu sin nabal-bal.

⁸Mes leka atoni mafutu neki kolen besi; in nasusbon natuin in mo'et anmes kun.

⁹Es nanet Uisneno mes naton sin sanat ma sin neka naeb.

¹⁰In namnauba sin hen panat In noina ma nasaitan sin maufinu.

¹¹Leka sin natuin Uisneno ma naluli nabes neu In, sin mes anmoni nok halan nekaf ma sin ka na'nuka fa talantia sin monin namsopu.

¹²Mes leka sin kan lomi fa he natnin, sin mes anmate anbi mono in nanan.

¹³Atoni le ma ka uisneno an unu in to'an; kan lomi fa he UISNENO antuntaku sin, es nanet In mes ankas sin.

¹⁴Sin mes nasusbok ma anmate leka sin fe munif, natuin sin monin nahenu nok nukat.

¹⁵Uisneno nanoina mansian nanet natuin nu'ut, In nabe'eb sin nao natuin ma'nukat.

¹⁶Uisneno nafetin ko na'ko susal ma nu'ut, talantia ho moni nok oe tene, ma ho mei nahenu nok mnahat ma mninut.

¹⁷Mes tabu le i nok ho maufinu, hom simo mani kasat.

¹⁸Ampantom he nati' kais anfuli ko neki noni; ma kais hom sek natuin amaus.

¹⁹Hom toti hen tuntaku ko mes ka maota fa, ale ho be'im ma ho matanim nane hom polin son-sona.

²⁰Kais hom lomi fai mesokan, tabu uf-uf namnoe ma namneku.

²¹Ampantom he kais ho moni mubalah anbi bulalu in nanan. Ho susal nane in otan esle' ho musaitan maufinu.

²²Mumnau, Uisneno nane In akuasat. Anmu'i anoina on In ka?

²³Sekau es anlek ma anlulu lanan neu In? Ai sekau es nabe'i he nok In hen mo'e sanat?

²⁴In mapules piut natuin In mepu, ma so ho muaiti In amsa.

²⁵Ale atoni nit In mo'et; mes kan mu'i fa esle' nahine nok amneot.

²⁶Uisneno nane apinat kun, hit kat su' tabe'i fa teki hit hine, ai kat so'i tan fa In ton sin.

²⁷Uisneno es anhel oe na'ko pah pinan anfani nope, ma naklelo in anfani oe ulan.

²⁸Nope naek nasanut ulan; ma in ankifun neu ale mansian.

²⁹Kan mu'i fa atoni mese he nahin nope in na'naon ma lotos in hanan anbi neno tnanan bale Uisneno anbine.

³⁰Limat in pinan nane antana neno tnanan, mes tasi in usan namesok nabalah.

³¹Nok lanan nane In namonib ale uf-uf, ma anfe sin mnahat nok athoes.

³²In anheke limat neki In nukun ma anlenu hen lami nani sa' le In ansali.

³³Lotos in hanan naton nak anmu'i nautus mes nem, ma mu'it amsa nahin neu anin naek mes anbol.