Read Uab Meto AYUB 37 Bible Online

AYUB 37 - Uab Meto bible

AYUB 37

¹Nautus anmo'e au nekak talantia na'tai ma au nekak anlilitai.

²Alki mitnin nai Uisneno In hanan; mitnin nai lotos le anpoi na'ko In fefan.

³In nafetin limat anbi neno tnanan funam natef, ma In nasanut ken neno talantia pah pian in tu'an.

⁴Nalali te, In hanan na'lu, In hanan anaek onle lotos ma nautus le neki, amtaus natuin ken neno nalim ma anpin.

⁵Lasi amkakat nane anbol natuin Uisneno In plenat, lasi amkakat le kat heke ma ka tahine fa.

⁶Sen-sene ansanu neu pah pinan natuin In plenat, ulan anaek ansanu natuin In es anlenu.

⁷In nasnasab mansian na'ko in mepu, he nati' sin nahin nak In nanaoba In mepu.

⁸Ma mu'i fui antam neu bola ma nuat, he namafo anbi sin kuna.

⁹Ain le'u anpoi na'ko bian a'li ma oe tene ma manikin anpoi na'ko bian a'ne'u.

¹⁰Uisneno In snasan naliteb oe naek in fafon, ma In nabaina anfani sen-sene le manu'.

¹¹In antao oe neu nope in tunan, ma nope nane anpin natuin limat in pinan.

¹²Nope-nope nane natboe anbi pah pinan funam natef, natuin Uisneno In plenat sin na'nonon nao neu me-me.

¹³Uisneno anfe ulan he napete afu, ai hen kas to mansian amsa; ai he naton neu mansian, neu In manekan nane naek tal nabal-bal.

¹⁴Amta' akle'o fe, hoi Nai Ayub ma mutnin; ampanat ale lasi amkakat Uisneno.

¹⁵Ho muhin ai kahaf Uisneno anfe taka' onme, talantia limat anpin na'ko nope ma neno?

¹⁶Ho muhin onme neu ale nope natboe naton kit neu Uisneno In hine neki amkakat?

¹⁷Kahaf, ho al amsakoi natuin maputu leka pah pinan antoman anin, na'ko bian a'li.

¹⁸Nabe'i ai kahaf ho hem fani on Uisneno he mo'e neno in obet ma mukbetab in onle nit molo ai nino?

¹⁹Munoina kai sa' esle' mes hai he miton neu Uisneno; hai tenab luman es nanet hai ka mihin fa sa' neu hai he miton.

²⁰Au ka lomi fa he toti he u'uab neu Uisneno, natuin kais-kaisa In napeni au sanat ma nale'un kau.

²¹Tabu le i neno in pinan nameusin talantia kat kiso fa leko teki matak, natuin anin es anfu naknino neno.

²²Neno in pinan onle mnatu anbol anbi bian a'ne'u, ma Uisneno In pinan nabeko hit nekak.

²³Namneo hit Uisneno In kuasat nane naek; es nanet hit ka tabe'i fa het haumak In, In nek muti ma amneot kun anbi ale fekat; In fe ka nasusu' nit fa mansian.

²⁴Es nanet ale mansian so ta usi neu In, ma In ka nail fa atoni le antek kon on ahinet.”