Read Uab Meto AYUB 38 Bible Online

AYUB 38 - Uab Meto bible

AYUB 38

¹Nalali te na'ko nautus in nanan UISNENO nak neu Nai Ayub nak:

²“Ho sekau ko, talantia nabe'i ho nekam naoni neu Au hine meki ho uab mono ma luman nane?

³Tabu le i hom hake ambi Au matak on atoni abe'it, ma mutae Au han taes sin.

⁴Hom bine mulali ai kahaf anbi tabu Au mo'e pah pinan? Muton kau kalu ho hine nane naek ma meunuan!

⁵Sekau es anlek ma anlulu nani pah pinan in meunuan? Sekau es anlek nani neki tani? Ho muhin In han taes ai kahaf?

⁶Ni ainaf pah pinan le i nahakeb sin onme ka? Sekau es antao nani fatu uf anaek,

⁷anbi tabu ale afkun sin ansi ma ale amonit anbi neno tunan namlilan.

⁸Sekau es an eka oe tasi, leka oe anpoi na'ko pah pinan?

⁹Au es a'tobe tasi eki nope ma mes mesokan an amu nan in.

¹⁰Au lek ani pah pinan in tu'an, ma Au eka ani in amsa.

¹¹Au ale ak neune ak, ‘Le i in tu'an. Kais hom finin! Ho oki-oki sin abe'it mes sin antu' anbi le i.’

¹²Hoi Nai Ayub, ai anbi haefes hom lenu manas nok-noka anbol ka?

¹³Ai anbi haefes hom lenu manas hen tana pah pinan ma anhoi napoitan atoni amaufinut na'ko bale le sin na'tolo' anbine?

¹⁴Manas in pinan naton kit nok amneot neu tubu ma nonof onle malak anbi auf makli'at ma sobalu betkone in li'an.

¹⁵Manas in pinan nane notu atoni le ma ka uisneno, ma sin kan mo'e fa lasi maufinu.

¹⁶Ai leka hom sanu mit meu tasi in nanan? Ai leka hom nao mutuin tasi in tu'an?

¹⁷Leka atoni naton neu ko eno anbi nopu maten matan le nahenu nok mesokan?

¹⁸Nabe'i ka ho mutenab man pah pinan in meunuan? Mutae nai leka ho muhine.

¹⁹Ho muhin ka neu meusine nane na'ko me ka? Ma mesokan nane naubon na'ko me ka?

²⁰Nabe'i ka he ho muton meusine ma mesokan nane sin tu'an sin?

²¹Oin ho muhin, natuin ho mumnasi, ma ho moni mulali anbi tabu anlek pah pinan!

²²Oin hom tam mulali meu bale le au upan sen-sene ma ul fatu,

²³le Au ubela neu tabu, nukat leka makenat anbol?

²⁴Ai ho muhin neu manas nane in na'u na'ko me ka? Ai anin neno saen nane in naubon na'ko me ka?

²⁵Sekau es nabe'i ka hen hani lolok neu anin anaek, ma anmo'e lanan neu lotos ma limat?

²⁶Sekau es nasanut ulan neu mnela snaen, ma neu bale le mansian ka natua fa anbine.

²⁷Sekau es anponi pah pinan le anmeto talantia hun anmoni ok-oke?

²⁸Ai ulan nane anmu'i in amaf ahonit? Ma ulan nane in amaf es sekau ka?

²⁹Ai sen-sene nane anmu'i in ainaf ka? Sekau ka es nahonis afkun le nakfatu?

³⁰Sekau ka es nabaina oe anfani fatu, ma sekau ka es anmo'e oe tasi talantia namep?

³¹Nabe'i ka he hom futun afkun anaek in aisan? Ai amsefi afkun ma iko in kolenat?

³²Nabe'i ka he ho muplenat afkun fait nome le antia in tabu, ai amlekan malafu sin lanan?

³³Ho muhin ai kahaf neu plenat anbi neno in oben? ma nabe'i ka he ho munaoba sin anbi pah pinan?

³⁴Nabe'i ka he nati' ho muplenat nope, anfunan ko nok ulan?

³⁵Ma leka hom lenu he nati' anmasimon, ai sin nem ma nak, ‘Au, Usi!’?

³⁶Kol otos nane nahin na'ko sekau leka Noel Nil nane nat'op? Sekau es naton neu manu naif nak ulan he nem?

³⁷Sekau es anso'i nabe'i nope ma nabaina in talantia nasanut ulan?

³⁸Ulan le nalitab afu hen fani klofo le nabuabon le anmahel es nok es?

³⁹Nabe'i ka he hom li'u ma amheke mnahat neu meo asu he nati' anhao in ana' sin,

⁴⁰leka sin namafo anbi nuat in nanan, ai sin antup anbi sin kuna in nanan?

⁴¹Sekau es anfiti kol ka le namnah ma natpen neum nem nami mnahat? Sekau amsa es antuntaku leka in ana' sin antoti he nahan?