Read Uab Meto AYUB 39 Bible Online

AYUB 39 - Uab Meto bible

AYUB 39

¹Ho muhin neu leka bibi ainaf nahonis in ana'? Ai leka hom toko ma amkiso lu fui nahonis in ana'?

²Ho muhin ka neu in na'apu nan lo ne ba'u? Ma hom so'i man neu leka in tabu antia he nahonis in ana'?

³Ho muhin ka leka in aon namen, neu he nahonis in ana'?

⁴In ana' sin anbo ma nanae anbi mnela snaen sin nao ma kan fani nem fa neu sin ainaf.

⁵Sekau es nafuib bikase luke mnanu anbi nasi? Sekau es ansefi in tani ma nafetin in he naoinson?

⁶Au fe neune mnela snaen anfani in ume ma in natua anbi mnela-mnela le nahenu nok nasi.

⁷In na'lo na'ko ale kot ma paha naek, kan mu'i fa esle' hen heke in ma namepub in.

⁸Hu sona anbi tubu anfani on bale he in nah, in nami hau le no mate anbi nane.

⁹Nabe'i ka bijae fui anmepu neu ko? Ai in anlomi ka he nati' antup anbi ho o'of?

¹⁰Nabe'i ka hom futu in ma mumepub in? Nabe'i ka he nati' hom lenu he nati' na'foi ko ho lene?

¹¹Ai mes hom futun ho nekam neu in be'in in matanin, ma mes ho muna'at neune ho mepu le mafena?

¹²Ai mes ho mufnek neu in he nati' in nabuab ho mepu in nesan, ma neki neu bale he ho muikab anbine?

¹³Kol paha snaen in ninen napese lo manoe le'uf! Mes in ka namnes fa nok kol to'amnanu.

¹⁴Kol paha snaen nateko anbi afu, nalali te in nasaitan; ma snaen es anliki nape' in teko.

¹⁵In ka nahin fa neu mes atoni nahapun nani ma mu'i fui nahapun nani amsa.

¹⁶In mo'e onle in ana' sin nane ka in-ini fa; in kan filoli fa leka in mo'et nane son-sona.

¹⁷Au es anmo'e talantia in anmono ma in nek manu', au ka fe neune fa hinet ma tenab alekot.

¹⁸Mes leka in anfen ma naen, in anpolin nani bikase nok in asaet.

¹⁹Hoi Nai Ayub, ho es amfe neu bikase be'it ma matani ma ho es amtao kablesu neu in a'kon?

²⁰Ho es amlenu ka he nati' in an el onle lamat, in eukli namtausab atoni.

²¹In anpas afu anbi nonof nok malinat, ma nok be'it ma matani in antam anbi bale hopu.

²²In ka nahin fa lilitais ma amtaus nane in otan, ma kan mu'i fa suni le anmo'e in he naen koti.

²³As'anef ma auni le in asaet neki nani sin naliman leka antoman pina.

²⁴Nok be'it ma matani bikase nane naen piut, in mes kan hake fa anbi in balan leka to'is nahan.

²⁵In an eukli leka to'is nahan ma na'ko lo in nafoi nit makenat in fon. In nen hunu na'ko meo naek sin leka sin anmo'e taka'.

²⁶Ai ho munoina kaka tasi he nati' natpen ma in nenu ninen leka in nao neu neno kabenan ne'u?

²⁷Ai kaka tasi panis natuin ho plenat nahun na'ko in anmo'e in kuna anbi tabu amnanut?

²⁸In nahakeb ume anbi tubu fatu in tunan; ma fatu panan le na aik nane anfani on in kot.

²⁹Na'ko bale nane in anpanat anfun natef, nok in matan in ankiso ma anpannat tin musu.

³⁰Anbi me anmu'i amates in esan, ma ale in anah sin ninu nani in musu sin na'.