Read Uab Meto AYUB 4 Bible Online

AYUB 4 - Uab Meto bible

AYUB 4

¹Ma Nai Elifas, nauab nak: “Ayub ho mes kam tofom fa leka au u'uab? Au ka nabe'i fa he nati' au ta' a'lo anteni.

³Ho munoina mulali atoni namfau, ma ho mumapan mulali ale a'olet sin.

⁴Ho noina sin es namepan sin, ma nafena atoni le nastun, an ole ma anlimae.

⁵Mes anbi tabu le i ho mes kum amtam anbi nu'ut; ho muskek, ho muoelbom.

⁶Ai ka al fa ho es mu'ki neu Uisneno; ma kan tek fa amle'ut anbi ho monim? Kalu onane so mumepan ho fnekat ma kais mumofu ho palsait.

⁷Mutenab nai, ai anmu'i atoni le ka nasanab fa le antam anbi su'at ma snama?

⁸Au uhin na'ko kisot nak atoni le naklelo lene maufinu, ma ankifun fini snama on fini masenan, in mes anseu su'at ma susal.

⁹To'as Uisneno onle nautus, le nale'un sin talantia naskuku.

¹⁰Atoni abulalut sin mes nanoi ma anbai, sin mes aninikai onle meu asu. Ma Uisneno mes nata'ab sin nalali te naipu sin niskenu.

¹¹Sin mes anmaten onle meo asu le nanuka mnahat, ma sin anhenu mes nastibok es nok es.

¹²Anmu'i mnitas mese neu kau, onle seof anbi au lukek nanan.

¹³Nafena ma naaiba kau na'ko tupas, onle nanait amle'ut anbi fai mesokan.

¹⁴Au uskek nok lilitais; au aok an ole natuin anlilitai.

¹⁵Ani'fu antoman au humak, es nane te au aok funun anfen.

¹⁶Ma onle aof mese anhake anbi au matak; au kiso, mes au ka uhin fa in. Ma au nen in hanan le nape' fai tainine.

¹⁷‘Oin ai mansian le ka nasanab fa anbi Uisneno In matan? Oin in le ka nasanab fa anbi Apakaet In matan?

¹⁸Es nane te ate-ate Uisneno abit neno tunan, in ka nafnek anteni fa neu sin. Ma anbi in ahake neno sin In napeni sin sanat ma sin amle'un.

¹⁹Sa' anteni amonit le naiti na'ko afu makli'at aof amonit le anhabi onle etu'.

²⁰Amonit nane in anmoni anbi nok-noka, ma in anmate ma mapolin anbi neno mabe ma tal nabal ka namnau fa in.

²¹Ma ale sa' le in anmu'i mes namneku; in anmate le ka napeni fa hinet.’