Read Uab Meto AYUB 40 Bible Online

AYUB 40 - Uab Meto bible

AYUB 40

¹Hoi Nai Ayub, ho muaiti ho matam ma amkiso neu Kau, Uisneno Akuasat Afin-finit; hom lomi ka he nati' mubaunom ai hom lomi he matoe?”

³Ma Nai Ayub natae UISNENO nak, “Au u'uab on atoni amonot, koi UISNENO. Au he utae Ko eki sa' ka? Kan mu'i fa sa'-sa' anteni le au he uton neu Ko.

⁵Amfau le'uf le au uton ulali neu Ko.”

⁶Nalali te anbi nautus in nanan UISNENO na'uab anteni neu Nai Ayub.

⁷UISNENO nakua a'an neu Nai Ayub nak, “Anhaumak Kau on meo naek, ma mutae Au han tanas sin le i.

⁸Ai ho he mutotan Au amneot ka, ma ho he mumneobom nalali te ho he musanab Kau?

⁹Ai ho abe'it ko on Au? Ai ho hanam on a'lotos on Au hanak?

¹⁰So hom amu ho amu meki amasat ma alimat, nalali te mubluaom meki nek mamun ma nek muti.

¹¹Ampanat sin le anmoni nok neka naeb; nalali te am opan ho to'as ma munebet sin.

¹²Namneo, ampanat atoni-atoni neka naeb ma munebet in! Amteli muskuku atoni amaufinut anbi sin bale.

¹³Amsub sin anbi afu in nanan; ma mutam sin neu naukel atoni amates.

¹⁴Es nanet Au mes a'pules ko natuin ho mis meki ho be'im anmes kun.

¹⁵Amkiso nai Behemot, mu'it a'naek; Au es anmo'e onle ho amsa. In neku hun onle bijae molo ma bijae meto.

¹⁶Mes hom kiso neu in be'in anbi in aon ma in matanin le anbi in uat sin!

¹⁷In naiti in ikon on hau bubuk, ma uat abe'it anbi in pusun namep ma manu'.

¹⁸In nuif sin namanun onle nit molo, ma in haen sin nenuok onle besi manu'.

¹⁹Anbi ale amonit le Au mepu ani in es neki amkakat; in nanaobon alkun neu in apakaet!

²⁰Anbi ale netu bale mu'i fui na'bae nok amlilat, hun anmoni anbine ma anfani in mnahat.

²¹In antup anbi kisan maskuna in nanan, ma in na'tolo' anbi nifu le mahun.

²²Kisan maskuna nahafo nan in. Ma hau naek anbi noe in ninen ankub nan in.

²³In ka na'tai fa leka Noe Yordan nahenu, in antainina maski nak oe antoman in human.

²⁴Sekau es nabe'i he nati' nafolob in matan, le nakleo nan neu in kotin ma anheke nan in.