Read Uab Meto AYUB 41 Bible Online

AYUB 41 - Uab Meto bible

AYUB 41

¹Nabe'i ka he hom heke man Besi, mnasi nane meki taun ika? Nabe'i ka he hom futu man in meki tani?

²Nabe'i ka he hom tao tani neu in panan ai besi kaif neu in fefan?

³Oin in antoti neu ko he nati' mufetin in, ai nauab nok ko he nati' hom nek in?

⁴Oin hom lomi mulali ma amanta'en he nati' in antuthae ko?

⁵Oin hom futu in onle kol kahu, le anhalin ate bife sin?

⁶Oin alak tasi sin nasosa ma anbati sin neu atoni alakan?

⁷Nabe'i ka ho mupau in pasu meki auni mat tenu ai hom nua mupe' in nakan meki auni besi?

⁸Amlep in hae mese, natuin ho mes kam teni fa; mabanat nane mes ho kam nikan tal nabal-bal.

⁹Ale atoni mese-mese le in nit Besi mnasi nane, in aon mes naklati ma natsel.

¹⁰In mes namaun leka tafena na'ko in tupas; kan mu'i fa atoni mese amsa nabe'i hen hake anbi in matan.

¹¹Sekau es nabe'i hen laban in ma ka napeni fa papa'? Anbi pah pinan kan mu'i fa esle' hen mo'e onane.

¹²Aim he Au piu ki neu Besi mnasi in aon, in be'in ma in masan.

¹³Kan mu'i fa es he napisu in sobalu kotif ai napisu in sobalu bet kone le in anpake anbi makenat.

¹⁴Sekau es nabe'i he nati' anfoi in su'in le nahenu, nok in nisin le nahakataun?

¹⁵In sa'un nane onle naketi auni ma anmalutan onle fatu amepat.

¹⁶Na'tuni, anmafutu namep, talantia anin kan tam fa nok ne amsa.

¹⁷Auni nane anmana ma anfani mese, talantia kat banaiko sin leko.

¹⁸Leka Besi mnasi nane an eus fani, in napoitan pina, in matan nalim onle manas anpe'.

¹⁹In man onle pina' anpoi na'ko in fefan; ma sapa liuf anpe' neu me-me.

²⁰Masu anpoi na'ko in panan, onle ai in masu anbi tasu in pinan.

²¹In snasan napoitan flae; ma ai pinan anpoi na'ko in fefan.

²²In a'kon nane matani, talantia sin al sin namtausan leka sin nem anbi in matan.

²³Kan mu'i fa bale malule anbi in pasun; natuin in manu on bes tias es nanet in kan pe' fa.

²⁴In nekan nanan manu' onle fatu, es nanet in ka naoelbon fa natuin in manu' ma namep on fatu fole.

²⁵Leka in anfen, atoni masisi amsa in be'in namneku, in ka nabloli fa natuin namtau.

²⁶Kan mu'i fa suni tapapa' in; auni, as'anef ai auni besi amsa ke nabe'i fa he nati' tapisu in aon.

²⁷Besi in nabaina anfani on hun ma nit molo in malulen onle hau le anmau.

²⁸Kan mu'i fa esle' nabe'i han li'u in; fatu le anpoli in nek in namnes nok aen ut.

²⁹Hau tuka in nabaina anfani hun le anmeto; in anmanis atoni le nua in neki auni.

³⁰In a'po'an anbi in tein onle fle pisa le na'aik. Onle bale hen kai klofo ma nape' nani.

³¹In ankiuf oe tasi talantia na'kot onle oe; onle nai mina le na'kot.

³²In nasaitan in nobin le napoitan pina', in nabaina tasi ma anfani fule le in masan muti.

³³Kan mu'i fa alaban neu in anbi pah pinan; in le nane amonit le ka nahin fa amtaus.

³⁴Mu'it abe'it matani in nanebet anbi in kisot; mes anbi ale mu'it amaufinut in fani on usif.”