Read Uab Meto AYUB 8 Bible Online

AYUB 8 - Uab Meto bible

AYUB 8

¹Ma Nai Bildad nak, “Ho muuab onle nane antia leka anteni? Ho uab nane onle anin es na'lu'.

³Uisneno ka napenub fa lasi amnonot; Uisneno fe ka nale'un nit fa lasi amneot.

⁴Oin ho anah sin nasanab nalali neu In, es nane te In ankas sin.

⁵Mes leka ho muhaoftom anbi In, ma amtoti nek mamun sako sanat,

⁶ma leka ho nekam nane naknino'on na'ko amle'ut, Uisneno of antuntaku ko nok manoe; ma anfani seun banin, In mes anpaloli nani ho ume nanan.

⁷Ho mu'im le namneku nalali ka maota fa leka hit tanesa nok sa' le mes ho mupeni mani.

⁸So hom panat noina na'ko atoni apalsait ma afnekat tabu ahunut, ma mutenab neu ho amaf sin monin.

⁹Hit uak le i pal-pala, ma hit ka tahin fa sa'-sa'; neno-neno hit monik onle mafo mese.

¹⁰So hom panat ma mutuin noina atoni apalsait ahunut sin, natuin sin uab anfani on noina neu ko.

¹¹‘Al anbi bale ma oe hun anmoni; ma ek fui anbi afu makpete.

¹²Leka oe amneto, hun nane mes anmolok, nahun na'ko pu'at bian. Mes anbi ahunut, in namlia ma fe kan tia, fa in tabu anlefi ma naotab nani.

¹³Atoni ma ka uisneno in monin onane in nikan Uisneno, es nane te in fnekat nane namneku.

¹⁴In na' namep neu abas nono mese; anfutun in afnek neu nab-naba in kuna.

¹⁵Nab-naba nane in kuna namep ka es in sonlaiton neune? Abas nane namep nabalah ka ai kahaf leka in na' namep neune?’

¹⁶Atoni leka ma ka uisneno in monin onle hun; leka manas antoman in namlia ma nahenu mnela.

¹⁷In a'ba'an anfutnon neu fatu anbi afu; in nopun namep ma kan le'uf labah.

¹⁸Mes anbi tabu le i, ho maunu hun le nane, in onle kan moni nit fa anbi bale nane.

¹⁹Namneo amlilat neu atoni abulalut onan; atoni bian nem ma anseka in.

²⁰Uisneno ka nasaitan nit fa atoni le na'ki neu In, ma In kan tuntaku fa atoni amaufinut sin.

²¹In mes anmo'e ho fefam, ma ho lulum nahenu nok malinat.

²²Atoni le nato'an ko mes anmo'e ma na baunon, ma atoni abulalut sin ume anbel ma namle'u.”