Read Uab Meto SIT PULES 10 Bible Online

SIT PULES 10 - Uab Meto bible

SIT PULES 10

¹Nansa' es Ho mu'lo mu'ko kau, koi UISNENO ma mu'tolo leka hai amtam anbi ma'lenat?

²Nok neka' naeb atoni amaufinut na'susu' atoni amamu'it; maut he nati' sin antam anbi sin akleot anmes kun.

³Atoni amaufinut na'naebon neu in salit amle'ut, atoni apalu ansukat ma antite UISNENO.

⁴Atoni asanat ankoti UISNENO, nok neka' naeb in natenab nak Uisneno ka esan fa.

⁵Atoni amaufinut napeni in mepu nesan; in ka nahin fa plenat UISNENO ma in nanebet ale atoni le anlaban in.

⁶In natenab anbi in nekan nak, “Au ma au sufa ka'uf sin mes ka namof kai fa, onle' atoni le kan moni fa anbi maufinu.”

⁷In mes ansukat piut, ha'mu'it ma poi, in uab sin nahenu nok nek asunu ma maufinu.

⁸In na'tolo' anbi kuan-kuan he na'mate atoni le ka nasanab fa. Onle' meo asu le in nao anbi nasi ninen in natnu' atoni a'olet. In anheke atoni amamu'it anbi bale a'tolo', in anheke ma anhel in anao.

¹⁰In na'luli, ma naloitnon hen ol; in namofu atoni nok bulalut anaek.

¹¹In natenab nak, “Uisneno nikan nalali ma kan kiso anteni fa; ma In of ka nit kau fa piut!”

¹²Amfen nai, koi UISNENO, ma amkas atoni amaufinut! Mumnau atoni amanukat sin!

¹³Nansa' atoni amaufinut sin nakle'at Uisneno piut ma natenab nak Uisneno mes kan kas fa sin?

¹⁴Mes Ho mit in; Hom kiso sin susal ma nu'ut, ma muloitan neu hem fiti sin. Atoni amanukat nana'at in aon neu Ko, ma Ho mes amtuntaku atoni amamu'it.

¹⁵Ma ipu mani atoni amaufinut ma abulalut sin kuasat; ma amkas sin natuin sin mo'et talantia sin anbelan.

¹⁶UISNENO es naplenat talantia nabal-bal; uf-uf le ka nahin fa In of namneku na'ko In afu.

¹⁷Koi UISNENO, Ho es amnen atoni anukat sin onen totis es nanet mumepan sin nekan.

¹⁸Ho es amfani alef lasi amneot neu li'anmanat ma atoni asutai ha'mu'it ma Hom pesi sin lasi, he nati' kais anmu'i atoni le ankas sin.