Read Uab Meto SIT PULES 102 Bible Online

SIT PULES 102 - Uab Meto bible

SIT PULES 102

¹Onen totis atoni anukat le ansaksi neu UISNENO leka in nahaebon.

²Koi UISNENO, amsimo au onen totis, maut he nati' au sakoit antia Ko.

³Kais Hom koit kau leka au tam anbi nukat. Amnen kau leka au sakoi neu Ko, ma mutae kau lab-labah.

⁴Au monit nemneku onle' ai masu; au nuif sin naklahan onle' ai.

⁵Au oel onle' hu meto, ma lomit neu he uah nemneku.

⁶Au anbai nok han a'aikat; au aok al pasu es an amu nuif sin.

⁷Au onle' kol to'amnanu abit mnela snaen, onle' kol atois anbi bale le kan mu'i fa tuaf.

⁸Au ka tup fa, onle' kol atainine anbi ume pupun.

⁹Au musu sin na'si'u kau anbi neno teme; atoni le nato'an kau sin namolok au kanak.

¹⁰Au uah afu on utunu', au mninut maselo nok matnu,

¹¹natuin Ho mait kau ma ampolin kau anbi Ho to'as le anpin in nanan.

¹²Au monik nafinbon onle' mafo anbi neno mabe; au maknene onle' hun.

¹³Mes Ho kum koi UISNENO, Kesel tal nabal-bal, mes namnau Ko na'ko batan nao neu batan.

¹⁴Hom fen amnek Sion, in tabu antia he nati' Ho musaeb Ho matakum neune.

¹⁵Natuin Ho ate sin nek in, maski nak in natsel nalali. Sin nekan anmof, maski nak in anfani afu.

¹⁶Ale pah namtausan UISNENO In kuasat; ma In anaet nane kesel namtausan,

¹⁷leka UISNENO nafena' nafani' Sion, ma In nem anbi In apinat.

¹⁸In anen In to anukat sin onen, ma In kan tite' fa sin totis.

¹⁹Amtui UISNENO In mepu sin neu ale amonit batan amunit, he nati' ale to le fe ka nahoni sin nabe'i anpules In.

²⁰UISNENO antae na'ko bale amnanut, ma na'ko neno tunan.

²¹In ankiso neu pah pinan, he natnin sakoit na'ko atoni pa'an ma nafetin atoni le he na'mate nani.

²²Es nanet In kanan mes mateka' anbi Sion, ma In mes mapules anbi Yerusalem,

²³leka ale to ma ale pah nabua he na'luli na'bes neu UISNENO.

²⁴UISNENO na'ipu au be'ik tabu au fe munif kau, ma In na'palan au uak.

²⁵Nalali te au u'uab nak, “Koi Uisneno, kais maiti au smanak anbi au monik in atnanan.” UISNENO, Ho amonit Ko tal nabal-bal,

²⁶Ho mepu muhunun pah pinan; ma neno tunan meki Ho nukum.

²⁷Ale sin mes namneku, mes Ho mes mubalah; ale sin mes amnau onle' pilu. Ma Hom polin onle' fanu kloef, ma al sin namneku.

²⁸Mes Ho mes mubalah, Ho monim nane mes ka namsopu fa.

²⁹Hai upuf sin mes anmonin nok oe tene', natuin Ho muneo ma muhafo sin.