Read Uab Meto SIT PULES 103 Bible Online

SIT PULES 103 - Uab Meto bible

SIT PULES 103

¹Na'ko Nai Daud. Ampules UISNENO, hoi au smanak, ampules In kanan knino, hoi su' smanak.

²Ampules UISNENO, hoi au smanak, kais amnikan In alekot!

³In es ansako ale Ho sanat sin, In es naleko' Ho menas sin,

⁴In es nafetin Ho smanam na'ko nopu maten, In es nathoeb neu ko neki manekan ma nek mamun.

⁵In es naloitan ho monim nok athoes, talantia ho munif ko on kaka tasi panis.

⁶UISNENO nanaob In plenat nok amneot, neu ale atoni anukat.

⁷In naton In salit neu Nai Musa ma In mo'et sin neu to Israel.

⁸Natuin UISNENO nane amanekat, nek mamun ma In manekan nathoe.

⁹In ka namaunu fa piut-piut, ma In ka nato' fa antia nabal-bal.

¹⁰In kan kas kit fa namnes nok hit sanat, ai In anseun banin kit namnes nok hit tanhais sin.

¹¹Mes on neno tunan in mnanun na'lo pah pinan in fafon, In manekan nane naek onan neu atoni afnekat.

¹²Onle' neno saen na'lo na'ko neno tesan, onane amsa' hit sanat sin In anpolin na'lo onan.

¹³Onle' amaf mese in nek in anhenu, onane amsa' UISNENO In nek atoni-atoni le namtausan In.

¹⁴Natuin UISNENO nahin nalali neu In anmo'e kit na'ko sa', In namnau kit natuin hit afu kit.

¹⁵Mansian in monin na'pal onle' hun, in anbo onle' a'tuna anbi lene;

¹⁶leka anin anfu, in mes namneku, ma in bale mes ka mahine anteni fa.

¹⁷Mes UISNENO In nek atoni nek muti', ma In manekan nane na'ko batan nao neu batan,

¹⁸neu atoni le na' nahel neu In fef bela, ma nok a'ki'at in nanaoba In plenat sin.

¹⁹UISNENO naplenat na'ko neno tunan, In kesel le ankuas ale sa'.

²⁰Ampules UISNENO, hoi ale ahake sin, le anen ma anmo'e In plenat sin.

²¹Ampules UISNENO, hoi ale amonit abit neno tunan, ale In ate le nanaoba In salit.

²²Ampules UISNENO, hi le In anmepu ki anbi ale bale le In naplenat. Ampules UISNENO, hoi au smanak!