Read Uab Meto SIT PULES 104 Bible Online

SIT PULES 104 - Uab Meto bible

SIT PULES 104

¹Ampules UISNENO, hoi au smanak! Ho Anaet Ko, koi UISNENO. Hom pake amasat ma apinat,

²ma Hom amuom meki pina. Ho mu'teta' neno tunan onle' um-ume,

³Ho mufena Ho Ume anbi oe abit neno tunan in fafon. Ho mubai nope anfani Ho aklet, ma anin anfani on Ho ninem.

⁴Ho mubai anin anfani Ho haef knino, ma limat anfani Ho atuthaes.

⁵Ho muki'ab pah pinan anbi in sukit, in ka na'beko' fa tal nabal-bal.

⁶Hom amu in meki tasi naek, in oe anbobok anbi tubu-tubu sin tunan.

⁷Leka Ho to'as anbol, oe nane ansai, ansai ka natfek fa natuin in a'lun.

⁸Oe ansai na'ko tubu-tubu neu nonof sin, neu bale le Ho muloitan neu in.

⁹Hom lek mani eka he kais in nao natuin, he nati' kais na'aeka' anteni pah pinan.

¹⁰Ho mutbolab ale oe mata anbi nonof sin, noe ana' sin ansai anbi tubu sin atnanan,

¹¹he nati' anfani mninut neu ale mu'it anbi lene, ma naneku bikaes fui sin meno.

¹²Ale kolo mes anmo'e kuna anhaumak in; ma sin anlisok anbi ale haunu sin tunan.

¹³Ho musanut ulan na'ko neno tunan neu ale tubu, es nanet pah pinan nahenu nok Ho mepu in nesan.

¹⁴Ho mumonib ale hun neu mu'it, ma ale utan neu mansian. Es nanet mansian ansen ale mnahat,

¹⁵ma napoitan tua' min kase le neki halinat. Ma mina bub fua mina amsa' le anmo'e sin human anpin, ma mnahat le anfe neu sin be'it matani.

¹⁶UISNENO anfe ulan athoes neu ale hau, hau aijo Libanon le In ansenan anmes kun.

¹⁷Anbi bale nane ale kolo nakun, kolo tel masu anmo'e kuna anbi in tunan.

¹⁸Bibi fui nabalah anbi ale tubu mnanu sin, meo fui na'tolo' anbi faut putun in bolan.

¹⁹Hom lek funan nane anfani eti ma tabu, ma manas nahin tabu in hen tes.

²⁰Leka Ho musanut mes'okan, neno anfai ma anmabe, ma ale mu'i fui anpoi ma nao.

²¹Ale meo fui ankanbai ma nami sin osat, ma antoti mnahat le Uisneno naloitan neu sin.

²²Leka manas anpe', sin na'aibon ma antup anbi sin bale tolo'.

²³Es nanet mansian anpoi he nanaoba sin mepu, ma sin anmepu talantia neno anmabe.

²⁴Ho mepu nane naek kun, koi UISNENO, Ho mepu mani sin nok nek ahinet talantia; pah pinan nahenu nok Ho mepu.

²⁵Amkiso neu tasi le anmenua, nahenu nok mu'it anaet ma a'baut le ka maso'ik fa.

²⁶Abnao sin anao natuin, kaun le'u tasi ma kaun tasi le Hom mepu mani sin natboe.

²⁷Sin alsin nafnek neu Ko, he nati' napeni mnahat anbi in tabu.

²⁸Hom fe neu sin, ma sin nabuab, Ho muloitan, talantia sin nah ma namsen.

²⁹Leka Ho kam lilo fa sin alsin namtau; leka Ho maiti sin snasan, sin anmate, ma sin anfani neu afu on afu un-unu.

³⁰Mes leka Hom fen sin asnasaf, sin mes anmonin; es nanet Hom fe monit fe'u neu pah pinan.

³¹UISNENO so Ho apinat nane antia nabal-bal! So nati' Ho namlil mok ale Ho mepu in nesan.

³²In nail pah pinan ma anmo'e ma anlilitai, In anlul ale tubu, talantia napoitan in masun.

³³Au he si sit knino neu UISNENO anbi au neno monit, au he si sit pules neu Uisneno leka au fe amoni.

³⁴So au sit nane antom nek In, natuin In es anhalin au nekak.

³⁵So atoni asanat namneku na'ko pah pinan, maut he nati' atoni amaufinut sin anmaten. Ampules UISNENO, hoi au smanak! So ampules UISNENO!