Read Uab Meto SIT PULES 105 Bible Online

SIT PULES 105 - Uab Meto bible

SIT PULES 105

¹So minaeb UISNENO, ma mibeno In anaet, ma etun In mepu neu ale pah-pah.

²Amsi sit pules neu UISNENO, mibeno In mepu le neki amkakat.

³In UISNENO Le Knino kun; namlil nai natuin hit le i in-ini kun, so ale na'bes neu In namlil.

⁴Amtoti be'it matani na'ko In, so miusi al neu In.

⁵Hoi Nai Abraham in ate nok in sufan; ma Nai Yakub atoni le In anbeti nok in sufan, mimnau ale lasi amkakat le In anmo'e, kais amnikan In fekat sin.

⁷In lo hit UISNENO kun, In fekat nane mes nanaobon neu pah pinan funam natef.

⁸In namnau In fef bela piut, ma In fef bela nane mes talantia nabal-bal.

⁹Fef bela nane In anmo'e nok Nai Abraham, ma namuni te nok Nai Ishak;

¹⁰ma In namepan anteni nok Nai Yakub, anfani fef bela nabal-bal neu to Israel.

¹¹In nakua a'an nak, “Au mes afe pah Kanaan neu ki, anfani hi pusak.”

¹²Anbi ahunut Uisneno In to nane anfani atoni anao mnemat anbi nane ma sin ka namfau fa.

¹³Sin na'oinsok na'ko pah nao neu pah, ma sin na'oina' na'ko pah es neu pah bian.

¹⁴Mes UISNENO ka nafetin sin fa he nati' sin; toman neu lasi nukat, In namnauba' kesel-kesel nak,

¹⁵“Kais mikoke atoni-atoni le Au beti ulali sin, ma kais anmo'e amle'ut neu Au mafefa knino sin!”

¹⁶UISNENO nasanut amnahas neu pah nane, ma In naiti mnahat le sin nabua nani.

¹⁷Mes In anlenu atoni mese anao nahunun sin, esle' Nai Yusuf le masosa on ate.

¹⁸In haen mafutu, ma in na'iun kolen besi anbi in to'an.

¹⁹Anbi amunit in uab nane natonon, in namneobon natuin UISNENO In uab.

²⁰Nalali te Kesel Mesir, ma ana' plenat, sin nafetin in na'ko pa'an.

²¹Anfe neune mepu he nati' anfani ablelot anbi sonaf, ma In es ankuas ale in amaus;

²²ma anfe sona he nati' anlek ma anlulu usif, in ablelot sin ma atopus neu ale mnasi-mnasi.

²³Nalali te Nai Yakub anao neu Mesir ma na'maika' anfani anao mnemat.

²⁴UISNENO anmo'e In to namfau talantia sin nabe'i nesin na'ko sin musu.

²⁵In na'baina atoni Mesir sin nekan talantia sin anek nanan In to, ma an aten sin.

²⁶Nalali te In anlenu In ate Nai Musa ma Nai Harun, atoni le In anbeti nani.

²⁷Sin naton ale lasi amkakat anbi pah Mesir, ma UISNENO In mepu naek sin,

²⁸ma sin natuin In plenat. Nalali te UISNENO names'okab pah le nane.

²⁹In na'baina sin noe sin anfani na', talantia ale ika anmate.

³⁰A'be'o anpoi ma nahenu sin pah, ma antam anbi kesel in sonaf.

³¹Natuin Uisneno In naplenat akbeo ansanu nem, ma basin nahenu pah le nane.

³²In nasanut sen-sene anseka ulan, nalali te In nasanut limat le anpin.

³³In nabelat tua' min kase ma hau bubuk, ma nabelat ale sin haunu.

³⁴Natuin Uisneno In plenat, In nasanut lamat namfau ma kat so'i tabe'i fa.

³⁵Sin nah nan ale hau sena anbi lene, ma nah nani pah in nesan.

³⁶Nalali te In na'mate ale li'ana mone nae na'ko ale atoni Mesir.

³⁷Nalali te In napoitan to Israel, sin neki mnatu ma noni muti', sin alsin nao nok aomina.

³⁸Amtaus antoman atoni-atoni Mesir, es nanet sin namlilan anbi tabu atoni Israel sin anpoi ma nao.

³⁹Uisneno naneo In to neki ni nope, ma In antana sin anbi fai neki ni ai.

⁴⁰Sin antotin, es nanet anfen sin kol pui, ma In anfen sin u tunu' na'ko neno tunan sin nah talantia namsenan.

⁴¹In nape' tubu fatu ma oe anpoi, ma ansai onle' noe anbi mnela snaen.

⁴²Natuin UISNENO In namnau In fef bela neu In ate Nai Abraham.

⁴³Es nanet In antopu In to nok malinat, ma atoni-atoni le In anbeti nani sin na'ba'.

⁴⁴Afu na'ko ale pah In anfe neu sin, ale sin lene In anfe neu In to sin,

⁴⁵he nati' In to, sin natuin In aplenat sin. Ampules UISNENO!