Read Uab Meto SIT PULES 106 Bible Online

SIT PULES 106 - Uab Meto bible

SIT PULES 106

¹Ampules UISNENO! Miliatas UISNENO, natuin In matakun; ma In manekan tal nabal-bal.

²Sekau es nabe'i nabeno' UISNENO In a'an, ma nasaeb pules neu In nok malinat?

³Ua alekot neu atoni le natuin In plenat sin, ma namneo piut anbi in mo'et.

⁴Mumnau kau, koi UISNENO, onle' Ho matakum neu Ho to, amtuntaku kau leka Ho mufetin sin.

⁵So nati' au it athoes le Hom fe neu atoni-atoni le Hom beti mani ma umlil mok Ho to. Nati' Ho malin mok atoni-atoni le anfani Ho ini.

⁶Hai misanab milali on afi hai na'i sin; hai mo'e milali maufinu ma bulalu.

⁷Tabu anbi Mesir hai na'i sin ka nahinen fa; Ho mepu naton amkakat mes sin kan hek fa in otan. Sin anikan Ho manekam le nathoe, ma anhaumak Tasi Gelagah sin anlaban Ko.

⁸Mes UISNENO anfen sin honis, he nati' Ho amnanut nane, natonon neu sin.

⁹Tasi Gelagah nane anmeto natuin Ho plenat, In neki In to nao natuin tasi, onle' natuin mnela snaen.

¹⁰Nok nane In nafetin sin na'ko musu sin niman, ma In nafetin sin na'ko kuasat musu.

¹¹Mes musu sin anleman anbi oe in nanan; ma kan mu'i fa esle' nafetnon.

¹²Es nanet In to nafnek neu In fef bela, ma sin ansi sit pules neu In.

¹³Mes noka smela sin anikan UISNENO In mepu, ma sin kan toti fa lekat ma lulut Uisneno.

¹⁴Anbi mnela snaen sin natuin sin lomin anmes kun, ma sin ansu' Uisneno.

¹⁵In anfe neu sin sa' le sin antoti, mes menas antoman sin amsa'.

¹⁶Sin nek nanan Nai Musa ma Nai Harun In ate knino anbi mnela snaen.

¹⁷Es nanet pah pinan anpe' ma an ol nan Nai Datan, ma ankub nah Nai Abiram nok in ume nanan sin.

¹⁸Nasanut ai neu sin, ma notu abulalut sin.

¹⁹Anbi Tubu Sinai sin anmo'e bijae molo na'ko mnatu, ma sin na'luli na'bes neu in.

²⁰Uisneno amnanut sin anseka neki bijae molo amneku hun in masan.

²¹Sin anikan Uisneno, sin Uisneno le anmo'e lasi naek anbi Mesir.

²²In mepu naton amtaus anbi pah nane, ma In naton amkakat anbi Tasi Gelagah.

²³Es nanet Uisneno ansali he nale'un In to, mes Nai Musa atoni le In anbeti an eka nani. Nai Musa anfani on atoni le anhake tnanan, talantia Uisneno In to'as an nain.

²⁴Nalali te sin antite pah amasat nane, natuin sin ka nafnek fa neu Uisneno In fef bela.

²⁵Sin na'munu es nok es anbi sin um-ume nanan, ma sin kan lomi fa he natuin UISNENO In hanan.

²⁶Es nanet In anmanta'en nok supat he nati' na'mate sin anbi mnela snaen.

²⁷In anpolin sin sufan neu pah-pah sin atnanan ma In naiti sin neu atoni mata teme sin pah.

²⁸Anbi Peor sin na'luli na'bes neu Baal, ma sin nah amnah fuat neu uisneno teta.

²⁹Sin mo'et nane nafena' UISNENO In to'as, talantia sin antoman asnama le neki amtaus.

³⁰Mes Nai Pinehas anfen ma ankas atoni le nasanab, es nanet asnama nane nasnas.

³¹Mo'et nane anfani taka' mese, ma sin namnau piut tal nabal-bal.

³²Anbi oe mata Meriba sin nato'ab UISNENO, ma nok sin mo'et sin nasusab Nai Musa.

³³Sin na'oleb Nai Musa in nekan, talantia in ka natenab fa in uab.

³⁴Sin ka nale'un fa uf-uf bian, onle' UISNENO naplenat neu sin.

³⁵Mes sin namesbok nok pah-pah nane, ma sin namat atoni ka ma Uisneno sin monit.

³⁶Es nanet sin na'usi neu faut le'u ma hau le'u, ma sin namofu sin monin.

³⁷Sin na'tulu' sin anah sin neu uisneno teta atoni Kanaan.

³⁸Sin na'opan atoni ka asanat in na'; sin anah sin na' he nati' na'tulu' nani neu uisneno teta; talantia sin nale'un nani pah nane.

³⁹Natuin sin mo'et-mo'et le nane sin anfani on atoni hainisit, ma ka na'ki' fa neu Uisneno.

⁴⁰Es nanet UISNENO napina' In to'as neu sin, ma In anlelan In to.

⁴¹In nana'at sin neu pah-pah, ma nafetin musu ankuas sin.

⁴²Es nanet musu an aten sin ma musu ankuas sin, ma na' natau sin anbi in niman.

⁴³UISNENO nafetin sin teni-teni, mes sin anlomin nesin lasi mabanat, talantia sin anmate anbi sanat in nanan.

⁴⁴Mes UISNENO In nen sin sakoit, ma In antae sin nukat.

⁴⁵Natuin sin Uisneno namnau In fef bela, ma In nek sin neki In manekan le anaek.

⁴⁶Atoni le natau antom nek sin ma In nek sin amsa'.

⁴⁷Mufetin kai, koi hai UISNENO, amnibun kai na'ko ale pah, he nati' hai minaeb, ma ampules Ho kanam knino.

⁴⁸Ampules UISNENO atoni Israel, na'ko tabu le i tal nabal-bal. Maut he nati' ale atoni nak, “Amin!” Ampules UISNENO!