Read Uab Meto SIT PULES 109 Bible Online

SIT PULES 109 - Uab Meto bible

SIT PULES 109

¹Neu atopu sit sin. Sit Pules Nai Daud. Koi Uisneno le mapules piut, so kais Hom koit kau.

²Natuin amaufinut ma abulalut sin anmaken nok kau ma nabeno' lasi poi natuin kun.

³Nok nek nanan sin na'akan kau, ma sin anlaban kau.

⁴Sin ansali kau, maski nak au nek sin, ma au onen ulali neu sin.

⁵Sin seunbanin au alekot neki maufinu, ma au nek mahoe nok nek nanan.

⁶Amlek man atoni amaufinut mese he nati' anlefi in lasi, maut he nati' sin anlaban in.

⁷Maut he nati' anlefi in lasi ma in sanat natonon, ma in onen totis na'baina anfani sanat.

⁸Maut he nati' in monin namsopu, ma atoni bian naiti in atoko.

⁹Maut he nati' in anah sin anfani li'an manat, ma in anfani bife banu.

¹⁰Maut he nati' in anah sin anfani amanukat ma afatis, ma anli'u na'ko ume le natsel nalali.

¹¹Maut he nati' in mu'in atoni atusat ansimo, ma atoni musik in mepu nesan.

¹²Kais anmu'i atoni le anek in, ma anek in anah sin le in nasaitan.

¹³Maut he nati' in sufan nale'un nani, ma in kanan manikan anbi batan amunit.

¹⁴Maut he nati' UISNENO namnau in na'if sin maufinu, ma in ainaf sanat kais manose.

¹⁵Maut he nati' UISNENO namnau sin sanat, ma kan mu'i fa es he namnau sin anbi pah pinan.

¹⁶Natuin atoni nane ka naton fa manekat anbi in monin. Mes in anhamu'i atoni anukat ma amamu'it, ma na'mate atoni anukat sin.

¹⁷In anlomi hen sukat; ma in kan lomi fa hen fe tetus, maut he nati' kais anmu'i halinat neu in.

¹⁸Neu in nukat nane anfani mo'et alekot, onle' antao bale pake. Maut he nati' sukat nane ansai ma antam onle' oe anbi in aon, ma onle' mina anbi in nuif sin.

¹⁹Maut he nati' sukat nane an amu in bale pake, ma anpun in onle' fatu tnanaf.

²⁰UISNENO anfe kasat neu atoni le anlaban kau, ma atoni le nakle'at kau.

²¹Mes amtuntaku kau namnes nok Ho fef bela, koi au UISNENO, natuin Ho manekam ma Ho matakum so mufetin kau.

²²Natuin au amamu'it ma anukat kau, ma au nek menas anae le'uf kun.

²³Au ala kle'ot umneku on mafo anbi neno mabe, ma nat peneb kau onle' a'lamat.

²⁴Au tuk na'tai natuin au unukbok, ma au nesak ansanu ma anmeot.

²⁵Atoni-atoni le nit kau, sin nakle'at kau ma anki'un sin nakan.

²⁶Amtuntaku kau, koi UISNENO, mufetin kau natuin Ho manekam.

²⁷Es nanet au musu sin mes nahin nak nane Ho mepu, le Ho kum, koi UISNENO, es anmo'e.

²⁸Maski sin ansukat kau, mes nati' Hom fe kau tetus. Maski sin anfen he namaeb kau; mes nati' Hom halin Ho ate.

²⁹Maski sin ansali kau sin anmoni anbi kle'at, ma lasi mae nane an amu sin bale pake.

³⁰Au he pules UISNENO nok hana' naek, amtola In kanan anbi In te sin buat.

³¹Natuin In anlefi ma nafetin atoni anukat, na'ko atoni le anlomi he na'mate sin.