Read Uab Meto SIT PULES 112 Bible Online

SIT PULES 112 - Uab Meto bible

SIT PULES 112

¹Ampules UISNENO! Ua alekot neu atoni nek muti', ma le natuin UISNENO In aplenat sin.

²In anah sin of ankuas pah le i, atoni nek muti' nane sin sufan mes ansimo tetus.

³In anah sin mes anmoni nok athoes, sin mes anmoni nok amlilat tal nabal-bal.

⁴Meusine mes natonon neu atoni amneot, atoni amonot, amanekat ma apafa.

⁵Ua alekot neu atoni nek mahoe ma anlomi tuntakus ma namneo anbi in lekat ma in lulut.

⁶Atoni nek alekot nane mes ka na'nuka fa anbi monit; natuin namnau in tal nabal-bal.

⁷In ka namtau fa leka in nen hanaf amle'ut, in anhaek na'ki' natuin in nafnek neu UISNENO.

⁸In ka na'oleb fa in nekan ai ka namtau fa, natuin in nahin nak in musu sin mes mali'uk.

⁹In anbeti in mu'in, ma in antuntaku anukat; in anmo'e alekot piut, es nanet in naplen ma na'usi in.

¹⁰Atoni amaufinut sin nit nalali te sin nato'an; sin neku sin nisin natuin sin nek nanan. Es nanet sin namle'un; ma sin afnekat nane namneku tal nabal-bal.