Read Uab Meto SIT PULES 115 Bible Online

SIT PULES 115 - Uab Meto bible

SIT PULES 115

¹Ka hai fa, koi UISNENO, ka neu fa hai, mes al haim pules neu Ko, natuin Ho manekam ma matakum.

²Nansa' ale uf-uf sin na'uab nak, “Sin Uisneno es me ka?”

³Hit Uisneno nane es neno tunan, In anmo'e sa' le In anlomi.

⁴Sin faut le'u ma hau le'u nane na'ko mnatu ma noni muti', le mansian anmo'e neki in niman.

⁵Sin anmu'in maf, mes kan na'uaben fa, sin anmu'in mataf, mes ka nitan fa.

⁶Sin anmu'in lukef, mes ka natninan fa, sin anmu'in pataf, mes ka nafoin fa.

⁷Sin anmu'in nimaf, mes kan foe fa, anmu'in haef, mes ka naon fa, ma kan mu'if hanaf le anpoi na'ko sin fefan.

⁸So atoni-atoni nane sin monin onan, ma nok atoni le nafnek neu In.

⁹Hoi Israel, so mifnek neu UISNENO, natuin hai atuntakus, ma In es nane'o ma nahafo ki.

¹⁰Hoi hi ana' fuat, mifnek nai neu UISNENO, natuin In es antuntaku ki ma nane'o ma nahafo ki.

¹¹Hoi hi atoni nek muti', mifnek nai neu UISNENO, natuin In es antuntaku ma nane'o ma nahafo ki.

¹²UISNENO namnau kit es nanet In anfe nani kit athoe neno. In mes anfe nani tetus neu to Israel ma neu Nai Harun ana' fuat in sufan.

¹³In mes anfe nani tetus neu atoni nek muti', leko a'baut ma anaet.

¹⁴So nait UISNENO namfaub hi anah, leko neu ki ma hi sufam.

¹⁵So nati' UISNENO ameput neno tunan, ma pah pinan anfe ki In athoe neno.

¹⁶UISNENO ini kun es neno tunan, mes in anfe nani pah pinan neu mansian.

¹⁷Atoni amates ma atoni le antam nalali neu nopu maten, kan pules fa UISNENO.

¹⁸Mes hit amonit so ta'naeb In, na'ko tabu le i tal nabal-bal. Ampules UISNENO!