Read Uab Meto SIT PULES 116 Bible Online

SIT PULES 116 - Uab Meto bible

SIT PULES 116

¹Au nek UISNENO, natuin In anen kau ma anpanat au totis.

²In anen kau, leka anbi ale tabu au sakoi neu In.

³Leka amle'ut anfun natef kau; ma hakataus maten antoman kau le na'oleb ma anhakatau kau.

⁴Es nanet au sakoi neu UISNENO, “Koi UISNENO, he mufetin kau.”

⁵UISNENO nane amanekat ma amneot kun; hit Uisneno In athoes ma nek mamun kau.

⁶UISNENO anpanat ma antitu atoni nek baun; tabu au ole In nafetin kau.

⁷Es nanet au smanak namne, natuin UISNENO nek mamun neu kau.

⁸UISNENO nafetin nani kau na'ko maten; ma In anhalin kau ma ka nafetin kau fa he utsel.

⁹Es nanet nabe'i he au umlil anbi au monit, anbi pah pinan anbi UISNENO In matakun.

¹⁰Au ufnek piut, maski au u'uab nak, “Au tam anbi ma'lenat.”

¹¹Leka au nekak na'oinson au nak, “Kan mu'i fa es he nati' au ufnek neu in.”

¹²Au mes he mo'e sa' neu UISNENO, anfani on seunbanit neu In manekan neu kau?

¹³Au mes u'tulu' tua' min kase neu UISNENO, anfani on pules ma naeb neu In matakun.

¹⁴Au mes utis au manta'en neu In anbi ale to sin matan.

¹⁵UISNENO mes ka na'mate fa atoni le In nek nani.

¹⁶Au le i Ho ate, koi UISNENO, au mes u'luli u'bes neu Ko, onle' Ho mufetin kau na'ko pa'an.

¹⁷Au mes eki tulu' naeb neu Ko; nalali te au onen neu Ko.

¹⁸Au mes utis au manta'en neu UISNENO, anbi Ho to sin matan,

¹⁹le nabua anbi Ume UISNENO, anbi kot Yerusalem in nanan. Ampules UISNENO.