Read Uab Meto SIT PULES 118 Bible Online

SIT PULES 118 - Uab Meto bible

SIT PULES 118

¹Minaeb UISNENO natuin In matakun, ma In manekan nane tal nabal-bal.

²So atoni Israel sin nak, “In manekan nane tal nabal-bal.”

³Ma so Ana' fuat knino sin nak, “In manekan nane tal nabal-bal.”

⁴So ale atoni nek muti' sin na'uab nak, “In manekan nane tal nabal-bal.”

⁵Anbi nukat au anbai neu UISNENO; es nanet In natae kau ma nafetin kau.

⁶Au ka umtau fa natuin UISNENO anhaek nok kau, es nanet mansian ka napeni fa lanan neu kau.

⁷UISNENO nekan kau he nati' anfiti kau, es nanet au mes it au musu sin naenan.

⁸Alekot kun leka ta'neo ma tahaoftok anbi UISNENO, na'ko tafnek neu be'it mansian.

⁹Alekot kun leka ta'neo ma tahaoftok anbi UISNENO, na'ko tafnek neu a'maus.

¹⁰Musu namfau anfun nan kau; mes nek kuasat UISNENO anli'u sin.

¹¹Sin anfun nan kau na'ko neno in kabenan ne'u; mes kuasat UISNENO anli'u sin.

¹²Sin na'tai kau onle' oni; mes kuasat UISNENO anli'u sin. Au u'mate sin anbi smela mese, onle' ai notu nani kisan.

¹³Sin anbe'u kau nok matani ma au ala kle'ot utsel, mes UISNENO antuntaku kau.

¹⁴UISNENO nane au meo naek le au ufnek neu In, In es nafetin nalali kau.

¹⁵Anbi In to sin ume anmu'i a'baf natuin sin anbe'u, “UISNENO naton lasi amkakat!

¹⁶Kuasat UISNENO anfe mnisat neu kit! UISNENO naton lasi amkakat.”

¹⁷Au mes ka mate fa, mes au moni ubalah, he nati' ubeno' UISNENO In mepu.

¹⁸UISNENO anfe noina ma'fena neu kau, mes In ka nana'at kau fa neu maten.

¹⁹Misoitan eno besi Ume UISNENO, he nati' au tam ma u'naeb In.

²⁰Le i UISNENO In eno besi, alkun atoni amneot es antam natuin in.

²¹Au pules Uisneno, natuin In natae au onen; totis ma In anfe kau amnisat.

²²Fatu le apakaet sin anpolin, In anfani on fatu naif.

²³Nane mepu UISNENO, le namneo namkakab kit.

²⁴Le i neno le UISNENO; anlek nani es nanet aim he ta'naeb In amalinat.

²⁵Haim toti Ko UISNENO, so mufetin kai, koi UISNENO, amfe neu kai amnisat.

²⁶Tetus ma athoen neno In le nem nok UISNENO In kanan, hai amfe neu ki athoen neno na'ko Ume UISNENO.

²⁷UISNENO nane le Uisneno kun, In nek mahoe neu kit. Amnao ma'at nai meki tun min kase tlaef anbi hi nimam nanan, ma anfun mitef baki tulu' UISNENO.

²⁸Ho au Uisneno Ko, au he u'naeb Ko, au Uisneno, au he uliatas Ko.

²⁹Ta'naeb UISNENO natuin In matakun, ma In manekan tal nabal-bal.