Read Uab Meto SIT PULES 119 Bible Online

SIT PULES 119 - Uab Meto bible

SIT PULES 119

¹Ua leko neu atoni le in monin kan heo' fa mes natuin UISNENO In amneot sin.

²Ua leko neu atoni le natuin In plenat sin, ma anlomi ma natuin UISNENO In lomin.

³Ua leko neu atoni le anmoni natuin UISNENO In lomin, ma kan mo'e fa bulalu.

⁴Hom fe Ho plenat sin neu kai, koi UISNENO, he nati' hai minaeb sin nok amnonot.

⁵So nait nok nek a'ki'at au utuin Ho lekat ma Ho lulut sin.

⁶Leka au mo'e utuin ale Ho plenat sin, au mes ka umaebok fa.

⁷Leka au unoina Ho fekat sin nok amneot, au pules Ko eki Ko eki au nekak oke.

⁸Au lomi he utuin Ho plenat sin, es nanet kais musaitan kau anbi au monit.

⁹Atoni munif anpanat nan in monin na'ko apenut leka in anmoni natuin Ho plenat sin.

¹⁰Au ami Ko nok au nekak oke, kais mufetin kau he au el ma tanhais Ho plenat sin.

¹¹Au tao Ho noina sin anbi au nekak, he nati' kais au usanab neu Ko.

¹²Au pules Ko, koi UISNENO, munoina' kau Ho lekat sin.

¹³Mes nok hana' naek au etun Ho plenat le Hom fe sin.

¹⁴Au utuin Ho plenat sin nok nek amlilat, namnes nok au mu'i kuk ale bnak.

¹⁵Au he unoina Ho fekat sin, ma au panat Ho lekat lulut sin.

¹⁶Ho lekat sin anhalin kau; ma au ka nikan fa Ho noina sin.

¹⁷So nati' Hom fe neu Ho ate kau, Ho athoe neno he nati' au moni ubalah ma utuin Ho noina sin.

¹⁸Amfai au matak he nati' au it noina le neki amkakat anbi Ho plenat.

¹⁹Al nok smela au u'maika' anbi pah pinan, kais mu'tolo' Ho plenat sin neu kau.

²⁰Au nekak namen natuin au ami Ko, anbi ale tabu, au lomi he nati' uhin Ho plenat sin.

²¹Ho munoina' atoni neka' moko, ma amhel atoni le anbeo na'ko Ho plenat sin.

²²Mufetin kau na'ko sin akleot ma si'u, natuin au mo'e ani Ho lekat ma Ho lulut sin.

²³Maski nak ana' plenat sin nabua ma anlaban kau, Ho ate kau mes utenab Ho lekat ma Ho lulut sin.

²⁴Ho lekat lulut sin anfani noina le anhalin au nekak.

²⁵Au tup anbi afu; es nanet muleko' au monik namnes nok Ho fef bela.

²⁶Ma au ma amsaksi au, mo'et sin es nanet Ho mutae kau; munoina' kau Ho fef bela sin.

²⁷Amtuntaku kau he au uhin Ho plenat sin, au utenab Ho noina le nahenu nok amkakat.

²⁸Au nekak au oel natuin nukat, mumepan kau namnes nok Ho fef bela.

²⁹Mu'lob kau na'ko lanan aseket, natuin Ho matakum, munoina' kau Ho plenat sin.

³⁰Au beti ulali he nati' utuin, ma umnau Ho plenat sin.

³¹Au utuin ulali Ho lekat lulut sin, koi UISNENO, kais mufetin kau he umaebok.

³²Nok nek amlilat au utuin Ho plenat, sin natuin Hom sato amteni au lasi hine.

³³Koi UISNENO, munoina' kau Ho fekat sin anten, he nati' au utuin sin talantia namsopu.

³⁴Amtao kau lasi hine neu Ho plenat sin he au utuin, ma unaoba sin eki au nekak oke.

³⁵So nati' au na' umepan Ho plenat sin, namnes nok au nek salit.

³⁶Amtao neu kau nek alomit he au utuin Ho lekat, anes na'ko lomit neu he fani amu'it.

³⁷Ampanat kau he nati' kais au unoina lasi luman, mumepan kau he au utuin Ho lomim.

³⁸Mumepan Ho fef bela neu Ho ate kau, le Hom fe mani neu atoni le natuin Ko.

³⁹Mu'lob kleot le neki amtaus neu kau, natuin Ho plenat nane neki halinat.

⁴⁰Mufe'un au monik, natuin Ho amneot Ko, au mu'i nek lomit he utuin Ho lekat sin.

⁴¹Koi UISNENO, muton neu kau fun Ho manekam neu kau, mufetin kau natuin Ho fef bela.

⁴²Es nanet au mes ube'i he utae atoni le nakle'at kau, natuin au ufnek neu Ho a'am.

⁴³Amtuntaku kau he au uton amneot, natuin au ufnek neu Ho fekat sin.

⁴⁴Au he na' utau Ho plenat, sin tal nabal-bal.

⁴⁵Es nanet Ho mes mufetin kau anbi monit, natuin au sali he utuin Ho noina sin.

⁴⁶Ho lekat sin mes au etun neu kesel sin, es nanet au mes ka umaebok fa.

⁴⁷Au he unaob Ho plenat sin nok malinat, natuin au nek Ko.

⁴⁸Au u'upab ma nek Ho plenat sin, ma utenab Ho lekat sin.

⁴⁹Mumnau Ho fef bela neu Ho ate kau le i, fef bela le anfe mepan neu kau.

⁵⁰Le i es anfe halinat neu kau anbi nukat, natuin Ho fef bela nane anfe kau honis.

⁵¹Atoni nek amoko na'si'u kau, mes au ka heo' fa na'ko Ho plenat sin.

⁵²Au umnau Ho fef bela le nabela' nani anbi ahun-hunut, es nanet au nekak anmalin, koi UISNENO.

⁵³Au nek to'an atoni amaufinut fun sin ka, natuin fa natuin fa Ho plenat.

⁵⁴Leka au uak na'pal anbi pah pinan, au mo'e Ho lekat sin anfani sit pules.

⁵⁵Au umnau Ko anbi fai, koi UISNENO, au na' umepan Ho plenat sin.

⁵⁶Au upeni halinat he nati' utuin Ho plenat sin.

⁵⁷Au ami Ko, koi UISNENO, au manta'en ak mes au unaoba Ho noina sin.

⁵⁸Nok au nekak oke au toti Ko hem fe kau Ho mahoem, amnek mumnau kau namnes nok Ho fef bela.

⁵⁹Au utenab ulali neu au mo'et, ma au manta'en he nati' utuin Ho plenat sin.

⁶⁰Au uloitan ulali ma ka pao fa he nati' unaob Ho plenat sin.

⁶¹Atoni amaufinut antao kleot neu kau, mes au ka nikan fa Ho plenat sin.

⁶²Au fen anbi fai atnanas he pules Ko, natuin Ho fekat nane amneot kun.

⁶³Au soba ale atoni nek muti', ma neu ale atoni le nanaoba Ho plenat sin.

⁶⁴Pah pinan nahenu nok athoes, koi UISNENO, munoina' neu kau Ho lekat lulut sin.

⁶⁵Ho mutis mulali Ho fef bela, koi UISNENO, ma mo'e alekot neu Ho ate kau.

⁶⁶Amfe neu kau nek ahinet, natuin au ufnek neu Ho plenat sin.

⁶⁷Nahun na'ko Ho hem kas kau, au heo' ulali, tabu le i au na' utau Ho plenat sin.

⁶⁸Natuin Ho nek mamun ma nek leko Ko, ma munoina' kau Ho plenat sin.

⁶⁹Atoni neka' moko na'si'u kau, mes au utuin Ho fekat nok au nekak oke.

⁷⁰Atoni-atoni nane ka nahinen fa, mes Ho plenat sin nane anhalin au nekak.

⁷¹Alekot kun leka Hom kas kau, he nati' au uhin Ho lekat sin.

⁷²Ho plenat sin maupa nes neu kau, na'ko mnatu ma noni muti' anbi pah pinan.

⁷³Ho es ampakae ma mo'e kau, amfe kau nek hine he unoina Ho plenat sin.

⁷⁴Atoni nek muti' mes namlil leka sin nit kau, natuin au ufnek neu Ho fef bela.

⁷⁵Au uhin neu Ho fekat sin nane amneot kun, koi UISNENO, Ho muplen kau meki Ho matakum.

⁷⁶Maut he nati' Ho manekam nane anfani halinat neu kau, namnasi nok Ho fef bela neu Ho ate kau.

⁷⁷Amnek kau, he nati' au moni ubalah, natuin Ho plenat nane anhalin au nekak.

⁷⁸Maut he nati' atoni neka' namaebok, natuin sin na'si'u kau, mes au utenab Ho plenat sin piut.

⁷⁹So atoni nek muti' nem neu kau, ma sin le nahin Ho lekat sin.

⁸⁰So nati' au nekak kais anbeo na'ko Ho plenat sin, he nati' kais au umaebok.

⁸¹Au nekak anlomi hen moni na'ko Ko; au ufnek neu Ho fef bela.

⁸²Au matak natfai natuin au pao he mutis ho fef bela, au ak, “Leka mes Ho hem halin kau?”

⁸³Au pasuk anunuon natuin alu tu min kase le namna, au mes ha nikan fa Ho lekat sin.

⁸⁴Ho ate kau mes alan antia leka anteni? Leka mes Hom kas atoni le anli'u natuin kau?

⁸⁵Atoni le ka natuin fa Ho plenat, sin anhani bola' he namofu kau.

⁸⁶Au mes ana' utau Ho plenat sin, amtuntaku kau, natuin sin anli'u kau kan mu'i fa in molok.

⁸⁷Ala kle'ot sin na'mate kau, mes au ka tanhai fa Ho plenat sin.

⁸⁸Mufetin kau natuin Hom nek kau, he nati' au utuin Ho plenat sin.

⁸⁹UISNENO, Ho a'am nane anhake na'ki' nabal-bal, anbi neno tunan.

⁹⁰Ho matakum nane anhake nabal, Ho es muhakeb pah pinan nabal.

⁹¹Ale sa' anmot natuin Ho plenat sin, nok nane amsa' Ho mumonib kau amsa'.

⁹²Bait Ho plenat sin nane kan fani fa au malinat in un, namneo au mate ulali anbi nukat in nanan.

⁹³Au mes ka tanhai fa Ho plenat sin piut, natuin nok nane Hom fe kau honis.

⁹⁴Mufetin kau, natuin au le i Ho in-ini kau, ma au lomi he utuin Ho plenat sin.

⁹⁵Atoni amaufinut anpao he na'mate kau, mes au he panat Ho plenat sin.

⁹⁶Au kiso amneot nane kle'o ha, ma amneot nane alkun Ho plenat sin.

⁹⁷Au nek Ho plenat sin; au he utenab sin anbi neno teme.

⁹⁸Au umnau Ho plenat sin, le antopu kau ma nahineb kau nes na'ko au musu-musu sin.

⁹⁹Au lasi hine nane anesin anoina sin hine, natuin au utenab Ho plenat sin.

¹⁰⁰Au uhine nesin ale mnasi, natuin au na' utau Ho plenat sin.

¹⁰¹Au u'lobok na'ko mo'et maufinu, ma au utuin neu Ho noina.

¹⁰²Au ka aikoti fa Ho plenat sin, natuin Ho es munoina' kau.

¹⁰³Ho uab nane lo min oni kun, in min oni nesin oin oef.

¹⁰⁴Ho plenat sin anfe neu kau nek ahinet, talantia au nek nanan mo'et bulalu.

¹⁰⁵Ho a'am nane anfani paku neu au haek, ma in pinan nane antana au lanan.

¹⁰⁶Au mes utiaba' Ho fef bela nok supat, he nati' au na' umep neu Ho fekat amneot.

¹⁰⁷Au tam anbi nukat, koi UISNENO, ampanat kau namnes nok Ho fef bela.

¹⁰⁸Amsimo au onen totis, koi UISNENO, ma munoina' kau Ho plenat sin.

¹⁰⁹Au una'at au smanak, mes au ka nikan fa Ho plenat sin.

¹¹⁰Atoni amaufinut nakleo kau, mes au ka heo' fa u'ko Ho fekat.

¹¹¹Ho plenat sin nane anfani au bnak tal nabal-bal, le anhalin au nekak.

¹¹²Au lomi he utuin Ho plenat sin talantia au uak namsopu,

¹¹³Au panat Ho plenat sin, ma au uto'an atoni le ka na'ki' fa neu Ko.

¹¹⁴Ho es ampesi kau ma muneo muhafo kau, es nanet au ufnek neu Ho fef bela.

¹¹⁵Hoi atoni amaufinut, mu'lo kau! Au he utuin au Uisneno In plenat sin.

¹¹⁶Mumepan kau namnes nok Ho fef bela he nati' au upeni honis, kais mufetin kau he au u'oleb au nekak.

¹¹⁷Mumepan kau he nati' au simo honis, ma panat Ho plenat sin.

¹¹⁸Hom tite' atoni le anbeo na'ko Ho lekat, ma sin nane son-sona kun.

¹¹⁹Atoni amaufinut Ho mu'baina sin anfani knutu, es nanet au utuin Ho lekat ma Ho lulut sin.

¹²⁰Au lilitai natuin au umtausan Ko, au nekak na'tai natuin Ho fekat.

¹²¹Au mo'e ulali amneot ma amnonot, kais muna'at kau neu au musu sin niman.

¹²²Au manta'en ak Ho mes amtuntaku kau, ma kais mufetin atoni-atoni neka' moko he na'susu' kau.

¹²³Nok au matak le anpin au pao tuntakus he mufetin kau, au pao fetin le Hom ta'en mulali neu kau.

¹²⁴Ampainote kau namnes nok Ho manekam, ma munoina' kau Ho lekat sin.

¹²⁵Ho ate kau, Ho mo'e kau, he nati' au panat Ho plenat sin.

¹²⁶Antia in tabu, koi UISNENO he nati' muplenat, natuin atoni sin antahai Ho plenat sin.

¹²⁷Au neka' nesin Ho plenat sin anesin mnatu, ma mnatu nesaf nok.

¹²⁸Ma au moni utuin Ho lekat; ma au uto'an atoni le anmo'e amle'ut.

¹²⁹Ho lekat sin nane namkakab kai, es nanet au utuin sin eki au nekak oke.

¹³⁰Leka Ho noina nane malefi, in neki meusine, ma anfe hine neu atoni a'baut.

¹³¹Au snasak ansae ma ansanu, natuin au umnau Ho plenat sin.

¹³²Amtae kau ma amnek kau, onle' Hom nek atoni le Hom lomi mani.

¹³³Mumepan kau anbi au lanan onle' Ho fef bela, kais mufetin maufinu naplenat kau.

¹³⁴Mufetin kau na'ko atoni-atoni le na'susu' kau, he nati' au utuin Ho plenat sin.

¹³⁵Amhake mok kau ma amfe kau Ho athoe neno, ma munoina' Ho fekat sin neu kau.

¹³⁶Au matnu ansai onle' noe, natuin ka nao utuin fa Ho plenat.

¹³⁷Ho amneot Ko, koi UISNENO, ale Ho plenat nane amneot kun.

¹³⁸Ho plenat le Ho musanut sin nane amneot kun ma namepan kai.

¹³⁹Au nekak anfen, natuin au musu anikan Ho noina sin.

¹⁴⁰Ho fef bela anhaek na'ki' ma mapalsai, ma au nek ani sin.

¹⁴¹Au a'baut ma amamu'it kau, mes au ka tanhai fa Ho noina.

¹⁴²Ho amneot nane anhaek na'ki' tal nabal-bal, ma Ho plenat sin naton amneot.

¹⁴³Susal ma nukat antoman kau, mes Ho fekat sin anhalin au nekak.

¹⁴⁴Ho lekat sin nane amneot kun; amfe neu kau nek hinet he nati' au moni ubalah.

¹⁴⁵Au sakoi neu Ko eki au nekak oke; ma mutae kau, koi UISNENO, au he utuin Ho plenat sin.

¹⁴⁶Au sakoi neu Ko; amfe neu kau honis, natuin au na' utau Ho lekat sin.

¹⁴⁷Anbi nok-noka au fen ma sakoi neu Ko ma toti tuntakus; au ufnek neu Ho fef bela.

¹⁴⁸Au be' anbi fai teme, ma au utenab Ho noina sin.

¹⁴⁹Amnen kau natuin Ho manekam, koi UISNENO, nok Ho amneot ampanat au monik.

¹⁵⁰Atoni le anli'u kau anhaumak, sin anmu'i salit amle'ut ma sin natuin fa Ho plenat sin.

¹⁵¹Mes Hom haumak kau piut, koi UISNENO, ma ale Ho plenat sin nane amneot kun.

¹⁵²Anbi ahun-hunut au uhin na'ko Ho noina sin, nok Hom lek ma amlulu mulali sin tal nabal-bal.

¹⁵³Amtae kau anbi au susal ma mufetin kau, natuin au panat Ho plenat sin.

¹⁵⁴Ampes mok kau anbi au lasi ma mufetin kau; mufetin kau namnes nok Ho fef bela.

¹⁵⁵Atoni amaufinut mes kan simo fa honis, natuin sin ka nanaoba fa Ho lekat sin.

¹⁵⁶Ho manekam nane naek kun, koi UISNENO, mufetin kau meki Ho amneot.

¹⁵⁷Atoni namfau namusu nok kau ma anli'u kau, mes au ka aikoti fa Ho plenat sin.

¹⁵⁸Au nek nanan atoni-atoni abulalut, natuin sin ka natuin fa Ho noina.

¹⁵⁹Amtae kau, koi UISNENO, natuin au nek Ho plenat sin, mufetin kau natuin Ho manekam.

¹⁶⁰Ho a'am nane amneot kun, ma Ho plenat sin nane in namneo tal nabal-bal.

¹⁶¹Ana' plenat sin na'meku kau ma kan mu'i fa in molok, mes al Ho plenat sin es au umtausan.

¹⁶²Ho fef bela es anhalin kau, onle' atoni le na'eku nok maus amasat.

¹⁶³Au uto'an lasi poi, mes au nek Ho plenat sin.

¹⁶⁴Au u'naeb Ko piut, natuin Ho plenat sin nane amneot kun.

¹⁶⁵Atoni le in nek Ho plenat sin nane anmoni nok amlilat, kan mu'i fa esle' an eka sin.

¹⁶⁶Au pao honis le nem na'ko Ko, koi UISNENO, au u'naeb Ho plenat sin.

¹⁶⁷Au utuin Ho lekat ma Ho lulut sin, ma au nek ani eki au nekak oke.

¹⁶⁸Au utuin Ho lekat ma Ho lulut sin, natuin Ho mit ale au mo'et sin.

¹⁶⁹So nati' au sakoit nane antian Ko, koi UISNENO, amfe neu kau nek ahinet namnes nok Ho fef bela.

¹⁷⁰Maut he nati' au totis antian Ko, amfe neu kau honis namnes nok Ho fef bela.

¹⁷¹Au he pules Ko piut, natuin Ho munoina' kau Ho fekat.

¹⁷²Au he si sit mese natuin Ho fef bela, natuin Ho plenat sin nane amneot kun.

¹⁷³So nati' nok nek lomit Hom tuntaku kau, natuin au beti ulali Ho lekat sin.

¹⁷⁴Au nekak ansinmakan lasi honis na'ko Ko, Ho plenat sin anhalin au nekak.

¹⁷⁵Maut he nati' au fe a'moni, he nati' au pules Ko, nati' Ho lekat sin nane antuntaku kau.

¹⁷⁶Au sek onle' bibi kase amnekut, es nanet Ho amu ma mami Ho ate kau, natuin au ka aikoti fa Ho plenat sin.