Read Uab Meto SIT PULES 122 Bible Online

SIT PULES 122 - Uab Meto bible

SIT PULES 122

¹Sit knino Nai Daud anbi nu'ut. Au umlil leka atoni nak neu kau nak, “Aim he hit atam teu Ume UISNENO!”

²Tabu le i haim tia' milali eno besi kot Yerusalem.

³Yerusalem le nafena' anfani kot, mabaki nok alekot ma amasat.

⁴Anbi bale ole i uf-uf na'ko pah-pah sin nabua, uf-uf na'ko pah le UISNENO anbeti nani, he nati' na'naeb In namnes nok In aplenat.

⁵Anbi bale le i kesel-kesel na'ko Nai Daud in sufan, anlefi in to sin lasi.

⁶Ma onen nai athoes neu Yerusalem: “So nati' atoni le sin nek ko ansimo athoes.

⁷So anmu'i halan anbi ho pah in nanan, ma anmu'i amneot anbi ho kot in nanan.”

⁸Neu au sob leko sin, au ak, “So nati' athoen neno neu ko!”

⁹Neu hit Ume UISNENO au usaeb, onen totis he nati' ho moni anbi halinat.