Read Uab Meto SIT PULES 132 Bible Online

SIT PULES 132 - Uab Meto bible

SIT PULES 132

¹Sit knino anbi nu'ut. Koi UISNENO, mumnau Nai Daud, nok in nukat ma in nu'ut sin.

²Kais amnikan in luli besa neu Ko, koi UISNENO, ma in sananet neu Ko Le Meo Naek, le Nai Yakub in Uisneno.

³In na'uab nak, “Au mes ka ta' fa anbi au ume, ai ka tup fa anbi au hala tupa',

⁵nahun na'ko au uloitan ume neu Nai Yakub in Uisneno, bale maika neu UISNENO Le Meo Naek pa'e.”

⁶Anbi Betlehem hit nen neu Peti Fef Bela, ma hit tapeni in anbi mnela Yaar.

⁷Aim he hit atnao teu Ume UISNENO, ma taluli tabes neu In anbi In human In matan.

⁸Munoebom amu ma antunon anbi Ho sonaf, koi UISNENO, mok Ho Peti Pef Bela, le anfani taka' neu Ho plenat.

⁹So nati' Ho to sin na'ba' nok amlilat, ma Ho ana' fuat sin anmoni natuin Ho lomim.

¹⁰Neu Nai Daud Ho ate, kais amtite usif le Hom beti mulali.

¹¹UISNENO ansup nalali neu Nai Daud; nak In mes kan nikan fa In fef bela. In nakua a'an nak, “Na'ko ho anah sin mes Au anmo'e anfani kesel hen seka' ko anbi plenat.

¹²Leka ho anah sin naki'an neu Au fef bela, ma sin natuin Au plenat sin, ho sufam mes naplenat anseka ko on kesel tal nabal-bal.”

¹³Natuin UISNENO anbeti nalali Sion; ma In anlomi hen fani bale le In na'maika' anbine.

¹⁴In nakua a'an nak, “Au mes u'maika' anbi bale le i talantia nabal-bal, ma Au lomi he uplenat anbi bale le i.

¹⁵Au mes afe athoes neu in monin, ma Au mes umsenab atoni-atoni anukat.

¹⁶Ana' fuat sin mes naton honis na'ko Kau; es nanet Au to sin mes na'ba' nok malinat.

¹⁷Na'ko Nai Daud in sufan mes Au lek ani anfani kesel; in plenat mes Au umepan ani.

¹⁸Athoes mes anbol anbi in pah, mes in musu sin mes namaebok.”