Read Uab Meto SIT PULES 139 Bible Online

SIT PULES 139 - Uab Meto bible

SIT PULES 139

¹Neu atopu sit sin. Sit Pules Nai Daud. Koi UISNENO, Ho es amtae au nekak ma muhin au monit.

²Ho muhin au mo'et sin; na'ko lo Ho muhin au tenab sin.

³Hom panat kau, leka anbi au mepu ai au usnas, Ho muhin au mo'et sin.

⁴Nahun na'ko au he umolok, Ho muhin sa' le mes au he uton.

⁵Hom panat kau anfun natef, ma nok Ho kuasat Ho muneo muhafo kau.

⁶Ho hinem nane amnaun le'uf neu kau, ma au ka heke ane fa eki au tenab.

⁷Au he u'tolo' neu me ka he nati' au ufetnok na'ko Ho kuasat? Au he aen neu me ka he u'lo na'ko Ho humam Ho matam?

⁸Leka au sae neu neno tunan, Hom bine, leka au tam neu nopu maten Ho esan.

⁹Leka au utpen utuin neno saen ai au u'maika' anbi neno tesan le na'lo,

¹⁰anbi nane amsa' Hom tuntaku kau; ma anbine amsa' Hom topu kau meki Ho nukum.

¹¹Leka au toti he nati' mes'okan an aum nan kau, ma meusine le anfun natef kau anfani mes'okan,

¹²mes'okan nane mes Ho kam so'i mani fa; ma fai nane anfani meusine on manas, ma mes'okan nane anfani meusine.

¹³Hom lek mani au aok nok in otan, leka au bi au aina in apun.

¹⁴Au he pules Ko natuin Ho mepu kau nok amasat! Au be' natuin Ho mepu sin namkakab kau.

¹⁵Tabu Ho mepu au nuifin, Ho muketib sin nok alekot anbi au aina in apun, ma au moni anbine nahenu nok tol-tolo', ma au ka u'tol'ok fa neu Ko.

¹⁶Ho muhin mulali kau anbi tabu au fe anbi au aina apun, Hom tui mani sin anbi Ho sulat; Hom lek mani au neno monit sin nahun na'ko au u'uba ani au monit.

¹⁷Ho tenab nane amnaun le'uf neu kau, koi Uisneno, ma in amfaun amfau le'uf kun;

¹⁸Leka au so'i, in amfaun nane anesin asnaen, leka au fen, au fe utenab neu Ko amsa'.

¹⁹So nati' Ho mu'mate atoni amaufinut, koi Uisneno, ma mu'lob atoni abulalut nane na'ko kau!

²⁰Sin na'uab amle'ut neu Ko, ma natuin Ho kot sin, ma anmo'e supat nok poi.

²¹Koi UISNENO, au nek nanan atoni le in nek nanan Ko, au nekak antofon neu atoni-atoni le anlaban Ko!

²²Au nek nanan sin, ma au ubaina' sin on musu neu kau.

²³Amtae kau lek-leko koi Uisneno, amtae au tenab sin, ma amsu' kau ma muhin au tenab sin.

²⁴Amkiso kalu ai anmu'i maufinu anbi au nekak, ma amtopu kau neu lanan honis.