Read Uab Meto SIT PULES 140 Bible Online

SIT PULES 140 - Uab Meto bible

SIT PULES 140

¹Neu atopu sit sin. Sit Pules Nai Daud.

²Koi UISNENO, mufetin kau na'ko atoni amaufinut, ampanat kau na'ko atoni le anmo'e lasi susu'.

³Sin natenab amle'ut anbi sin nekan ma anbi neno-neno sin anmo'e matoes.

⁴Sin man on kaun laso, ma sin uab on laso na'ko liuksaen.

⁵Koi UISNENO, ampanat kau na'ko atoni amaufinut sin kuasat, ampanat kau na'ko atoni le anmo'e lasi susu' ma nami lanan he namofu kau.

⁶Nok a'ten-tena atoni neka' moko antao kleot neu kau, ma nauf nani tifkai hen heke kau. In antao nani habi anbi lanan he namofu kau.

⁷Koi UISNENO, au ak: Hom fani au Uisneno, amnen au onen totis.

⁸UISNENO, au abe'it ma afetin, Ho muneo ma muhafo mulali kau anbi makenat in nanan.

⁹Kais mutis mani atoni amaufinut sin salit, koi UISNENO, kais amkolan sin lomit he natiabon.

¹⁰Kais mufetin au musu sin hen be'u kau; mau he nati' sin uab amle'ut le na'si'u kau sin ansutai nafani'.

¹¹So sin ansimo sukat na'ko Ko, ma sin mapolin neu nopu maten ma kais sin anmoni anteni.

¹²Maut he nati' amle'ut antoman atoni le anmo'e lasi susu', ma kais mufetin abulalut sin natua pah pinan.

¹³Au uhin Ho es amfe amneot neu atoni anukat, ma Ho es ampesi atoni amamu'it sin lasi.

¹⁴Atoni amneot mes anpules Ko; ma sin mes natua nabua nok Ko.