Read Uab Meto SIT PULES 141 Bible Online

SIT PULES 141 - Uab Meto bible

SIT PULES 141

¹Sit Pules Nai Daud. Au sakoi neu Ko, koi UISNENO, amfit man kau lab-labah! Amnen kau leka au sakoi neu Ko.

²Amsimo au onen totis anfani fua tulu' afomenit, ma au nimak natfai anfani fuat anbi fai.

³Koi UISNENO, ampanat au fefak ma au luluk.

⁴Mu'lob kau na'ko salit amle'ut. Kais mufetin kau he ubua ok abulalut sin ma uah ok sin anbi sin buat.

⁵Leka ahinet mese nabokan kau, ma nanoina' kau nok nek muti', nane anfani mina alekot neu kau. So nati' kais au tite', natuin au onen toti piut ma laban sin mo'et amle'ut.

⁶Leka sin ana' plenat sin mapolin na'ko nonof fatu, sin an au ma ansaksi nak au uab nane amneot kun.

⁷Hit nuifin mes nasiteb anbi nopu naukel in ninen, onle' naskuku' fatu mese anbi afu.

⁸Mes au ufnek ubalah neu Ko, koi UISNENO, kais mufetin kau he au mate, natuin au uneo ma uhaoftok anbi Ko.

⁹Ampanat kau na'ko kleot le sin antao neu kau, na'ko amaufinut sin habi.

¹⁰So sin antam anbi sin akleot anmes kun, mes so nati' au upeni honis.