Read Uab Meto SIT PULES 142 Bible Online

SIT PULES 142 - Uab Meto bible

SIT PULES 142

¹Sit knino Nai Daud, leka in anbi nuat in nanan.

²Nok han a'aikat au sakoi neu UISNENO; ma nok han anaek au toti hem tuntaku kau.

³Au uton au nek nu'ut anbi In human In matan; ma au uton au nukat neu In.

⁴Tabu nek ole antoman kau, Ho muhin sa' le au he mo'e ani. Anbi lanan le au he nao utuin au, musu sin antao nani kleot neu kau.

⁵Tabu au aiti' au matak, ma au kiso kan mu'i fa tuntakus neu kau. Kan mu'i fa le anpanat kau, naneo ma nahafo kau.

⁶Au saksi neu Ko, koi UISNENO, natuin Ho amfani au bale pesit, al kun Ho es ampainote kau anbi au monit.

⁷Amnen au sakoit, natuin au tam anbi nu'ut. Mufetin kau na'ko au musu, sin niman natuin sin nabe'in nesin kau.

⁸Mufetin kau na'ko pa'an, ma anbi Ho to sin buat atnanan au mes apules Ho kanam, natuin Ho mo'e mulali alekot neu kau.