Read Uab Meto SIT PULES 143 Bible Online

SIT PULES 143 - Uab Meto bible

SIT PULES 143

¹Sit Pules Nai Daud. Koi UISNENO, amnen nai au onen totis, ma mutis au salit. Natuin Ho manekam mutae kau, ma natuin Ho amneot amsimo au onen totis.

²Au le i Ho ate kau, es nanet kais amlefi au lasi, natuin ka tit fa esle' ka nasanab fa anbi Ho matam.

³Au musu sin anli'u ma namaeb kau, ma sin he natam kau neu po'an mes'okan; ma au fani on atoni amates.

⁴Au aok an ole ma anlimae, au nekak an akman.

⁵Au umnau au neno monit sin anbi ahun-hunut; au utenab ale Ho mo'et sin, ma une'ob ale Ho mepu sin.

⁶Au u'bes antia afu ma au onen neu Ko; ma au smanak ansinmak neu Ko.

⁷Mutae kau lab-labah, koi UISNENO, natuin au ole ma limae. Kais mu'lo mu'ko kau, he nati' kais au monik onle' atoni amates le ansanu nalali anbi nopu maten.

⁸Anbi nok-noka mumnauba' kau neu Ho manekam, natuin au ufnek neu Ko. Muton kau lanan le au he nao utuin, natuin al neu Ko au usaeb au onen totis.

⁹Au onen neu Ko he uneo ma uhaoftok, koi UISNENO, mufetin kau na'ko au musu sin.

¹⁰Munoina' kau he nati' au unaoba Ho lomim, natuin Ho au Uisneno. Ho nek mamun Ko, le mes hem topu kau ma munon kau neu lanan alekot.

¹¹Mufetin kau natuin Ho fef bela, koi UISNENO, natuin Ho matakum, mufetin kau au us'unu.

¹²Mu'mate au musu sin natuin Ho manekam, mule'un sin le na'susu' kau, natuin au le i Ho ate.