Read Uab Meto SIT PULES 144 Bible Online

SIT PULES 144 - Uab Meto bible

SIT PULES 144

¹Sit Pules na'ko Nai Daud. Ampules UISNENO, au aneot ahafot! In es nanoina' kau lasi makenat.

²In es antuntaku kau ma anpesi kau, In es nafetin kau bale au uneo ma uhaoftok. In es anpanat kau, au bale upestok neune, In nanebet ale pah-pah neu kau.

³UISNENO, mansian nane sa' ka es Hom panat In? In sekau ka talantia Ho muupab in?

⁴Mansian nane on anin, in monin nane onle' mafo le anfin man kon.

⁵Koi UISNENO, Ho neno tunan natfai ma amsanu nai, ampoe ale tubu he naton sin masu.

⁶Musanut Ho limat he nati' nasiteb ale musu, mufetin Ho as'anef he nati' sin namtau.

⁷Amnona Ho nukum na'ko neno tunan, ma mufetin kau na'ko noe sako. Mufetin kau na'ko atoni

⁸anao mnemat sin kuasat le anlomi kun lasi poi ma kake', ma naiti supat nok poi.

⁹Au mes a'si sit fe'u es neu Ko, koi Uisneno, ma u'bae heo ma si nok.

¹⁰Hom fe mnisat neu kesel sin, ma mufetin Ho ate Nai Daud.

¹¹Mufetin kau na'ko atoni abulalut sin suni; mufetin kau na'ko atoni anao mnemat sin kuasat, le anlomi lasi poi ma kake', ma anmo'e supat nok poi.

¹²So nati' hit li'ana mone leka sin fe muinfin sin onle' hau sena le na'nae. Ma so hit anfeto sin onle' ni amasat, le anpin anbi sonaf in nisun.

¹³So hit ume mnahat sin nahenu nok pah in afan ma in balun. So hit bibi kase anbi mnela nahoni antia nifun bo'mese.

¹⁴So nati' hit bijae molo sin anpe' ma namfau, ma kan mu'i fa amnekut ai anhoen nani. So leko kais atnen ateni sakoit nukat anbi hit kot in nanan sin.

¹⁵Ua alekot neu pah le sin monin onane, ua leko neu atoni le na'uis kun neu UISNENO!