Read Uab Meto SIT PULES 146 Bible Online

SIT PULES 146 - Uab Meto bible

SIT PULES 146

¹Ampules UISNENO! Hoi au smanak ampules nai UISNENO!

²Au he pules UISNENO anbi au neno monit sin, ma au he si sit knino neu Uisneno leka au fe moni bine.

³Kais mifnek neu ana' plenat, neu mansian le mes kan fe ki fa honis.

⁴Leka sin anmaten, sin mes anfani neu afu; ma anbi neno le nane ale sin sakoit mes namneku.

⁵Ua alekot neu atoni le na'pane ma nafnek neu In UISNENO, ma nafnek neu Nai Yakub in Uisneno anfani In atuntakus.

⁶In es anmepu neno tunan ma pah pinan, tasi nok in nesan oke, ma In matakun nane tal nabal-bal.

⁷In anpesi nok atoni-atoni anukat, ma In anfe mnahat neu atoni le namnah. UISNENO nafetin atoni pa'an sin,

⁸ma anmo'e atoni matfolo sit nitan. In anfiti atoni le natsel, ma In nek atoni-atoni amneot.

⁹In naneo ma nahafo atoni anao mnemat; In antuntaku bife banu ma li'an manat, mes In an eka salit atoni amaufinut.

¹⁰UISNENO nane kesel kun tal nabal-bal. Hoi Sion, ho Uisneno nane akuasat kun na'ko batan nao neu batan. Ampules UISNENO!