Read Uab Meto SIT PULES 147 Bible Online

SIT PULES 147 - Uab Meto bible

SIT PULES 147

¹Ampules UISNENO! Natuin alekot kun leka atpules In, ma atsi sit pules neu In nane neki halinat!

²UISNENO mes nafena' nafani' Yerusalem; In mes neki atoni-atoni le mapolin ma nafani' sin.

³In mes naleko' nafani' atoni nek amle'ut sin, ma an amu sin papa'.

⁴In anlek nani afkun abit neno in oben in amfaun, ma In nakanab nani sin es nok es.

⁵Hit UISNENO nane anaet ma amatanit kun, In nek ahinet nane mes namsopuf.

⁶In namepan atoni anukat, mes In anpolin atoni amaufinut antia afu.

⁷Amsi sit pules neu UISNENO, mibae heo nai neu hit Uisneno,

⁸In es anlek nani nope anbi neno tunan; In es naloitan ulan neu pah pinan.

⁹In es namonib hun anbi tubu. In es anfe mnahat neu mu'it sin, ma neu kol koa ana le no'en piut.

¹⁰UISNENO ka namlil fa natuin bikase abe'it; ai ka neu fa meo naek amatanit amsa'.

¹¹Mes UISNENO anlomi atoni nek muti', ma neu atoni le nafnek neu In manekan.

¹²Ampules nai UISNENO, hoi Yerusalem! Ampules Ho Uisneno, hoi Sion!

¹³Natuin In namepan Ho eno naek sin, ma anfe In athoen neno neu ho to.

¹⁴In anpanat ho pah he nati' hi moni nok amnonot, ma In namsenab ki neki aen kase alekot.

¹⁵In anfe In aplenat neu pah pinan, ma In uab sin naton nani anbi mo'et.

¹⁶In nasanut sen-sene onle' abas, ma In nasanut akum ma tani onle' afu skuku.

¹⁷In nasanut ul sen-sene onle' fatu mnutu; kan mu'i fa es neu hen sutai oe tene' ma manikin.

¹⁸Es nanet natuin In aplenat sen-sene nane anfani oe; In anfu anin, es nanet oe ansai.

¹⁹In natiab In han ba'an neu In to, In lekat ma In lulut ma In aplenat sin neu In to le In anbeti.

²⁰In kan mo'e fa onan neu uf-uf bian, ma sin ka nahin fa In plenat sin. Ampules UISNENO!