Read Uab Meto SIT PULES 148 Bible Online

SIT PULES 148 - Uab Meto bible

SIT PULES 148

¹Ampules UISNENO! Ampules UISNENO, hoi neno tunan nok in nesan! Ale sin le na'maika' anbi bale amnanut, so ampules In!

²Ampules In, hoi ale In ahake neno ki, ampules In, hoi ale meo pukan neno tunan!

³Ampules In, hoi manas, ma funan, ampules In, hoi ale afkun apinat!

⁴Ampules In, hoi neno amnanut, ampules In, hoi oe abit neno fafon!

⁵So leko sin ala sin ampules UISNENO In kanan, natuin sin alsin anmot nalali natuin In aplenat.

⁶In anlek ma anlulu bale es nok es, In lekat nane na'ki' nabal-bal.

⁷Ampules UISNENO, hoi pah pinan nok in nesan, hoi ale kaun le'u tasi nok tasi ainaf;

⁸hoi limat ma ul sen-sene, sen-sene ma nope, nautus le natuin plenat UISNENO!

⁹Ampules In, hoi ale nuaf ma tubu, ale hau mafua ma ale nasi;

¹⁰ale mu'it ma mu'it fui, ale kauna anonok ma ale kolo!

¹¹Ampules In, hoi ale kesel ma ale pah, ale atoni amu'it ma ale ana' plenat;

¹²ale munif atoni ma munif bife, ale amnasit ma ale munif.

¹³Alekot kun leka sin alsin anpules UISNENO In kanan, natuin In kanan nane naek anesin ale kanaf; ma In anaet nane anesin neno tunan ma pah pinan.

¹⁴In namepan nalali In to, sin es nanet to Israel, le In nek nani anpules na'naeb In. Ampules UISNENO!