Read Uab Meto SIT PULES 18 Bible Online

SIT PULES 18 - Uab Meto bible

SIT PULES 18

¹Neu atopu sit sin. Sit Pules Nai Daud, ate UISNENO. Ansi nani neu UISNENO anbi nafetin Nai Daud na'ko Nai Saul ma na'ko in musu-musu sin.

²Au nek Ko, koi UISNENO, au be'it matani es Ko.

³UISNENO onle' kot matani bale au uneo ma uhaoftok. Au Uisneno on tubu fatu bale au uneo ma uhaoftok. In onle' ben aninit neu kau, In anpanat ma anpao kau he nati' au umlil piut.

⁴Au sanaen neu UISNENO le mes taliatas, In nafetin kau na'ko au musu-musu sin.

⁵Maten anfun natef kau, ma noe sako maten anbobok kau.

⁶Maten anfun natef kau, ma habi maten es au matak.

⁷Au sanaen neu Ko UISNENO, au anbai neu au Uisneno ma totis hen tuntaku kau. In nen au hanak na'ko In Ume ma In natae au totis.

⁸Es nanet pah pinan anainun ma na'tai, ma tubu-tubu sin sukit na'beko natuin Uisneno In to'as.

⁹Masu' anpoi na'ko In panan, ai ma flae anpoi na'ko In fefan.

¹⁰Neno anbaitson, nalali te In nanebton anbi nope metan anbi In haen.

¹¹In antunon anbi ahake neno tunan; ma In natpen nas il'ion anbi anin in ninen.

¹²In an amu nan In aon neki mes'okan; nope metan mafaun an amu nan In.

¹³Na'ko limat anbi In matan, napoitan nope, ul sen-sene ma ai.

¹⁴UISNENO In hanan onle' lotos anpoi na'ko neno tunan; Akuasat Anesit naton In hanan.

¹⁵In naklaon In as'anef sin ma nasiteb musu sin; ma In limat anuanon anteni-teni ma anmo'e sin naenan.

¹⁶Es nanet tasi in sukit natonon ma pah pinan in tu'an natfai leka UISNENO naskekeb In musu sin nok to'as.

¹⁷UISNENO nenu In niman na'ko neno tunan; In na' kau ma In anhel kau ma napoitan kau na'ko oe in nanan.

¹⁸In nafetin kau na'ko musu sin be'in ma na'ko atoni-atoni le nato'an kau, natuin sin nabe'in nesin kau.

¹⁹Sin anken kau leka au tam anbi snama, mes UISNENO anfani au atuntakus.

²⁰In nafetin kau na'ko maten ma In nahoin kau natuin In nek kau.

²¹UISNENO anseun banin au mo'et alekot sin; In anfe kau tetus natuin au ka usanab fa.

²²Au utuin UISNENO In plenat ma au ka koit fa au Uisneno.

²³Au panat ale In noina, ma au ka ele ma tanhai fa In plenat sin.

²⁴In nahin neu au nek muti' kau ma au u'lob au aok na'ko sanat.

²⁵UISNENO ansen banin au mo'et alekot sin natuin In nahin neu au ka usanab fa.

²⁶UISNENO, Ho mu'kian neu atoni le na'ki' neu Ko ma nek mahoe Ko neu atoni nek leko.

²⁷Ho mutonom neu atoni nek muti', mes Ho mumusu mok atoni amaufinut.

²⁸Ho mufetin atoni nek amnebet, mes Ho mumaeba' atoni neka' moko.

²⁹Ho mupina' au paku; au UISNENO Ho es amtana mes'okan le an amu kau.

³⁰Hom hatani kau he nati' au u'mate au musu; nok tuntakus na'ko au Uisneno au uskuku' sin kot.

³¹UISNENO natis nani In mo'et In han manta'en nane namneo lo teb. In anfani ben aninit neu atoni le naneo ma nahafo anbine.

³²Natuin alkun UISNENO; Uisneno es anpesi kit.

³³Uisneno nane es anhatani kau ma In es anpanat kau anbi au lanan.

³⁴In es namepan au haek on lus in haen, ma In es anpanat ma nafetin kau anbi tubu.

³⁵In es nanoina' kau neu makenat, talantia au enu klaot le namep.

³⁶UISNENO, Ho es muneo ma muhafo kau ma mufetin kau, ma amtuntaku kau nok Ho kuasat; ma au is natuin Ho plenat.

³⁷Hom panat kau he nati' kais au tam anbi pa'an, es nanet au ka utsel it fa.

³⁸Au li'u u'aenab au musu sin, ma au nao mat piut talantia au u'mate sin.

³⁹Au utseleb sin talantia kan fenan tenin fa, sin natselan anbi au haek nanan ma ka nane'on fa.

⁴⁰Hom fe kau be'it matani he nati' au maken, ma au be'u au musu sin.

⁴¹Ho mo'e talantia au musu sin naen na'ko kau; ma au u'mate atoni-atoni le nato'an kau.

⁴²Sin anbai, mes kan mu'i fa atuntakus, sin ansananen neu UISNENO, mes In ka natae fa sin.

⁴³Au uskuku' sin onle' afi skuku, ma au pitil ani sin onle' klofo anbi lanan.

⁴⁴Ho mufetin kau na'ko to abulalut, ma Ho mo'e kau on ana' aplenat neu ale uf-uf; ma uf le au ka uhine fa anfani au ate.

⁴⁵Atoni anao mnemat sin na'bes neu kau ma sin natuin leka au uplenat sin.

⁴⁶Sin be'it matani nane namneku nalali; sin na'ati' ma anpoi na'ko sin kot.

⁴⁷UISNENO nane amonit kun! Pules maliatas neu au apesit! Pules minaeb Uisneno au afetin!

⁴⁸In es anbe'u au musu sin; ma In es nanebet ale uf-uf anbi au matak,

⁴⁹ma In es nafetin kau na'ko atoni le nami lanan neu kau. UISNENO, Ho es ambe'u au musu sin, Ho es ampanat kau na'ko atoni abulalut.

⁵⁰Es nanet au u'naeb Ko anbi ale uf-uf sin matan, ma au he si sit pules neu Ko.

⁵¹Uisneno anfe mnisat anaek neu In usif, ma In nek atoni le In anbeti nani, esle' Nai Daud ma in sufa ka'un talantia nabal-bal.