Read Uab Meto SIT PULES 19 Bible Online

SIT PULES 19 - Uab Meto bible

SIT PULES 19

¹Neu atopu sit sin. Sit Pules Nai Daud.

²Neno tunan naklile' Uisneno In apinat, ma neno In oben naton In mepu.

³Neno es an etun neu neno es anten; fai ahunut an etun neu fai amunit.

⁴Kan mu'i fa amolok ai a'uab, ma kan mu'i fa hanaf.

⁵Mes a'an ma etun anbi pah pinan funam natef, ma tonin nane antia pah pinan in tu'an. UISNENO anmo'e obet neu manas,

⁶leka in pinan natonon anbi nok-noka namnes onle' nai mnuke anpoi na'ko in ke'an, onle' meo naek anao nok malinat.

⁷In nao natuin neno na'ko aon bian ankon anbi aon bian; kan mu'i fa le nafetnon na'ko in maputun.

⁸UISNENO in plenat nane amneot kun, ma neki halinat neu smanak. UISNENO In plenat sin mapalsai, ma anfe nek hine neu atoni amonit.

⁹Lekat UISNENO nane anmatom, ma neki nek halinat. Fekat UISNENO nane knino, anmo'e atoni ma nahin.

¹⁰Luli besa neu UISNENO nane leko, kun ma nanaobon tal nabal-bal. Plenat UISNENO nane alekot ma amneot kun.

¹¹Plenat UISNENO maupa nesin mnatu nesaf namin oni nesin oin hau.

¹²Ho mumnaub Ho ate kau meki Ho plenat sin; upan naek Ho muloitan neu atoni le anmo'e natuin.

¹³Kan mu'i fa es hen be' na'ko in elet tanhais sin; UISNENO, mufetin kau na'ko sanat le na'tol'on.

¹⁴Mu'lob kau na'ko sanat le sin mo'e kau, ma kais mufetin kau he in naplenat kau. He nati' kais au ulahi ma au ufetnok na'ko ale elet tanhais le ma'fena.

¹⁵Nati' au molok ma au tenab sin antom nek Ko, koi UISNENO, au aneot ahafot ma au afetin!