Read Uab Meto SIT PULES 25 Bible Online

SIT PULES 25 - Uab Meto bible

SIT PULES 25

¹Sit Pules Nai Daud. Neu Ko, koi UISNENO, au usaeb au onen totis,

²koi Uisneno, au ufnek neu Ko! Kais mufetin kau he au umaebok, ma au musu sin na'ba' kau.

³Atoni le na'le'uf Ko in mes namaebon, mes le nafnek neu Ko mes ka nanebet fa.

⁴Muton Ho lomim neu kau, koi UISNENO, muton neu kau sa' le au mes he mo'e ani.

⁵Munoina' kau ma amtopu kau he nati' au moni utuin Ho lomim, natuin Ho Uisneno le mufetin mani kau, ma anbi au monik au futun au nekak neu Ko.

⁶Mumnau Ho nek leko ma Ho manekam, koi UISNENO, le Ho muton mani neu kau anbi ahun-hunut.

⁷Amsako au sanat ma au elet tanhais sin anbi tabu au munif kau, mumnau kau meki Ho manekam ma Ho alekot.

⁸Natuin UISNENO nek leko ma amneot, In es naton lanan neu atoni aseket.

⁹UISNENO antuntaku atoni nek amnebet, ma nanoina' sin In lomin.

¹⁰Atoni le natuin In manta'en ma In plenat sin, In anmo'e nani sin nok manekat ma a'ki'at.

¹¹Koi UISNENO, amsako au sanat natuin Ho manta'en, natuin au elet tanhais sin namfau.

¹²UISNENO nanoina' atoni apalsait lanan le mes sin he nao natuin.

¹³Sin mes anmoni nabalah anbi athoes, sin nami amaus ma mes nasanut nani neu sin upuf sin.

¹⁴UISNENO anfani sob leko neu atoni apalsait, In mes naton In salit neu sin.

¹⁵Au u'aiti au matak neu kun UISNENO, natuin In es nafetin kau na'ko maten.

¹⁶Amtae kau, ma amnek kau, natuin In es nafetin kau na'ko maten.

¹⁷Au nek nu'ut antu'an ma nao mat piut, es nanet mufetin kau na'ko au nek as'unu.

¹⁸Mail kau anbi au mane'at ma au nukat, ma amsako ale au sanat sin.

¹⁹Amkiso nai ale au musu sin namfau; ma sin an un to'an neu kau.

²⁰Ampanat kau ma mufetin kau, he nati' kais au umaebok, natuin au uneo ma uhaoftok anbi Ko.

²¹So nati' nek muti' ma amneot anpanat kau, natuin au ufnek neu Ko.

²²Koi Uisneno, mufetin Ho to na'ko sin nek as'unu.