Read Uab Meto SIT PULES 28 Bible Online

SIT PULES 28 - Uab Meto bible

SIT PULES 28

¹Sit Pules Nai Daud. Koi UISNENO, au toti neu Ko, Ho au afetin, amnen au sananet. Leka Ho ka mutae kau fa, au mes on atoni le ansanu nalali neu nopu maten.

²Amnen au sakoit leka au toti he nati' Hom tuntaku kau, ma au aiti' au nimak neu Ho Ume knino.

³Kais mu'mate kau nok atoni abulalut, ma nok atoni le anmo'e maufinu. Sin na'uab nok athoes, mes sin nekan nahenu nok mo'et amle'ut.

⁴Amkas sin natuin sin mo'et, natuin amle'ut le sin anmo'e. Ma amkas sin namnes nok sin mo'et; amfe neu sin kasat le anmatai.

⁵Sin ka na'upab fa UISNENO taos, ai sa' le In anmepu nani. Es nanet In mes ankas sin, ma nale'un sin talantia nabal-bal.

⁶Au pules u'naeb UISNENO, natuin In nen au onen totis.

⁷UISNENO nane au aneot ahafot ma au afetin, es nanet au ufnek neu In. In antuntaku kau ma In anhalin au nekak, au u'naeb In eki si tulu'.

⁸UISNENO anfe be'it matani neu In to, In nis nan ma nafetin kesel le In anbeti.

⁹Mufetin Ho to, koi UISNENO, amfe tetus neu atoni-atoni le Ho ini kun. Hom fani on atukus mese neu sin, ma ampanat sin talantia nabal-bal.