Read Uab Meto SIT PULES 29 Bible Online

SIT PULES 29 - Uab Meto bible

SIT PULES 29

¹Sit Pules Nai Daud. Pules Nai UISNENO, hoi ale amonit abit neno tunan, minaeb In apinat ma In kuasat.

²Pules Nai UISNENO In kanan le knino kun ampake Hi bale luli besa ma mibes nai neu In.

³Uisneno afinit anesit nakua a'an anbi tasi fafon, In hanan na'lu anbi tasi luf sin fafon.

⁴UISNENO In hanan manena, nahenu nok kuasat ma matani.

⁵UISNENO In hanan nabelat ale hau, ma na'ipu aijo anbi Libanon.

⁶In anmo'e Tubu Libanon naletib on bijae tipu, Tubu Siryon an oklon on bijae fui.

⁷UISNENO In hanan onle' limat in pinan.

⁸UISNENO In hanan anbeko paha mnela snaen, UISNENO anhasu mnela snaen Kades.

⁹UISNENO In hanan anbeko ale hau, ma nakua hau non abit nasi in nanan; tabu nane In to le anbi Ume UISNENO sin nak, “Pules miliatas UISNENO!”

¹⁰UISNENO anmu'i kuasat neu noe sako, In anmu'i kuasat on Usif mese talantia nabal-bal.

¹¹So nati' UISNENO anfe be'it matani neu In to, ma nati' In anfe neu sin In athoes.