Read Uab Meto SIT PULES 31 Bible Online

SIT PULES 31 - Uab Meto bible

SIT PULES 31

¹Neu atopu sit sin. Sit Pules Nai Daud.

²Au uneo ma uhafo neu Ko koi UISNENO, es nanet kais mufetin kau he u'oelbok. Amfe honis natuin amneot

³amnen kau ma mufetin kau lab-lab. Hom fani on tubu fatu bale au uninbok neu Ko, onle' kot matani, le anbi Ko au upeni honis.

⁴Namneo, Hom fani on tubu fatu ma kot matani neu kau! Amtopu kau natuin Ho han manta'en.

⁵Mufetin kau na'ko lio' le sin anmo'e neu kau, natuin Hom fani on bale pesit.

⁶Anbi Ho nimam nanan au una'at au aok; Ho mufetin kau, koi UISNENO, le a'ki'at.

⁷Au nek nanan atoni le na'usi neu uisneno teta; mes au ufnek al neu UISNENO.

⁸Au mes umlil ma um'eok natuin Hom nek kau mubalah. Ho mail kau anbi au nukat, ma Hom tae kau anbi au susal.

⁹Ho ka mufetin kau fa he au mofu anbi musu sin niman, mes Ho mufetin kau he au nao nok leko.

¹⁰Amnek kau, koi UISNENO, natuin au tam anbi susal; au matak anmenan ma au kae ma kul, au smanak au aok na nu'on natuin au u'unu.

¹¹Au monik nahenu nok nukat, ma au usopu au uak anbi olet in nanan. Au ulali au nenuk natuin au maufinu, talantia au nuif sin an olen.

¹²Au fani atoni maheke neu au musu sin, ma neu au aok bian sin. Au soba sin naskeken leka sin nit kau, sin neman ma natef nok kau anbi lanan.

¹³Sin nikan kau on atoni amates, ma au fani onle' bale mapolin.

¹⁴Anmu'i amtaus anbi ale bale; au nen au musu sin na'munu. Sin nabua he nati' anlaban kau, ma sin nami lanan he nati' na'mate kau.

¹⁵Mes au ufnek neu Ko, koi UISNENO, natuin Ho au Uisneno.

¹⁶Hom panat kau piut; mufetin kau na'ko au musu sin, ma mufetin kau na'ko atoni-atoni le anli'u kau.

¹⁷So nati' Hom nek Ho ate kau; mufetin kau natuin Ho manekam.

¹⁸Kais mufetin kau he au umaebok, koi UISNENO, natuin au anbai neu Ko. Namaut he atoni amaufinut sin namaebok, ma namaut he nati' sin na'ten'ok ma antaman neu atoni amates sin balan.

¹⁹Amsun atoni apoiba sin fefan kais natfai le nok neka' naeb sin na'akan atoni amneot.

²⁰Ho alekot nane nathoe le Ho muloitan neu atoni apalsait! Sekau le naneo ma nahafo anbi Ko, in mes nit Ho alekot nane.

²¹Ho munini sin anbi Ho mafom na'ko atoni amaufinut sin lanan; Hom panat ma muneo muhafo sin na'ko sin musu sin uab sin.

²²Pules maliatas neu UISNENO! Natuin In manekan neu kau neki, amkakat anbi tabu sin anfun natef kau ma anken kau.

²³Leka au nekak an oel au utenab ak UISNENO anpolin naneku kau na'ko In human In matan. Mes In nen au totis leka au baisenu In.

²⁴Hoi ale In to ki, so leko him nek UISNENO, UISNENO es naneo ma nahafo atoni le an nek In. In mes anseun banin neu atoni le na'naebon ma of ka na aifa In nekan.

²⁵Amhaek mu'ki ma mumepan ho nekam, hi alki le mifnekan neu UISNENO!