Read Uab Meto SIT PULES 33 Bible Online

SIT PULES 33 - Uab Meto bible

SIT PULES 33

¹Hoi atoni-atoni nek muti', mi'ba' ma mimlil nai natuin UISNENO anmo'e nalali ale lasi; so atoni nek muti' anpules naliatas In.

²Minaeb UISNENO meki heo, miliatas In meki leku.

³Amsi sit fe'u neu UISNENO, mibae heo nok alekot ma mi'ba' nok malinat!

⁴UISNENO In a'an mapalsai; fun In antitu ma anpao In mepu.

⁵In nek atoni nek muti' ma amneot; In nek nani pah pinan nok in nesan.

⁶UISNENO anfe In plenat, es nanet neno tunan anmot; manas, funan ma afkun anmot natuin In a'an.

⁷Ale oe tasi In nabuab anbi bale mese, In an eka tasi uf anbi baik lape in nanan.

⁸Maut he nati' pah pinan nok in nesan namtausan UISNENO ma ale atokos anbi pah pinan na'bes neu In.

⁹Natuin al In nakua a'an ale sa' anmot; In anfe plenat ale sa' anbol.

¹⁰UISNENO an eka uf-uf sin tenab, ma In naikoti sin salit.

¹¹Mes UISNENO In tenab anhaek na'ki', ma In salit nane nabalah anbi ale batan.

¹²Ua alekot neu atoni le nafnek neu UISNENO anfani on in Uisneno, ua alekot neu atoni le mabeti ma anfani In ini sin!

¹³Na'ko neno tunan UISNENO ankiso neu pah pinan, In ankiso ale to mansian.

¹⁴Na'ko In toko' UISNENO anpanat ale sin anbi pah pinan.

¹⁵In es antao neu sin neka', ma In nahin ale sin mo'et.

¹⁶Ka tit fa usif le anbe'u natuin to meo namfau, mes ka tit fa meo pa'e le nafetnon neki sin matanin.

¹⁷Kat futnok fa neu bikase he nati' atbe'u musu, in matanin ka neu he nek fa mnisat.

¹⁸UISNENO anpao ma antitu atoni-atoni nek muti' le nafnek neu In manekan.

¹⁹In nafetin sin na'ko maten, ma anfiti sin monin na'ko amnahas.

²⁰Es nanet hit tafnek neu UISNENO, natuin hit atuntakus es In ma hit afetin es In.

²¹Hit tamlil natuin In ma hit tafnek neu In kanan knino.

²²So nati' Hom nek kai piut, koi UISNENO, natuin haim futun hai nekam neu Ko.