Read Uab Meto SIT PULES 34 Bible Online

SIT PULES 34 - Uab Meto bible

SIT PULES 34

¹Sit Pules Nai Daud, leka in anmo'e son on amaunut anbi Nai Abimelekh in matan, talantia anli'u ma nalali te in nao kun.

²Au he u'naeb UISNENO anbi ale tabu, ma au ka usnas fa anbi pules liatas neu In.

³So au he uliabok natuin UISNENO In mepu; ma nati' atoni anu'ut sin an nen In ma sin namlilan.

⁴So hi mok kau minaeb UISNENO, aim ala kit ta'tuna In kanan.

⁵Au onen neu UISNENO, ma In natae kau, ma In nafetin kau na'ko ale amtaus.

⁶Atoni le anhamu'i sin anfutun sin nekan neu In ma sin namlilan, ma sin kan mu'i fa tenab neu he namaebok.

⁷Atoni anukat sin an onen ma UISNENO natae sin, ma nafetin sin na'ko sin as'unu.

⁸Ahake UISNENO anpanat atoni nek muti', ma nafetin in na'ko amle'ut.

⁹Hom tamis ameskum UISNENO In manekan, ua alekot neu atoni le naneo ma nahaofton anbi In.

¹⁰Mimtausan UISNENO, hoi In to ki, natuin atoni nek muti' in mes ka na'nuka fa.

¹¹Meo asu sin namnahan natuin na'nuka mnahat; mes atoni le na'luli na'bes neu UISNENO in ka na'nuka fa.

¹²Mitnin nai, hoi au anah ki, au unoina ki he nati' hi mimtausan UISNENO.

¹³Him lomi ka he him au mnanu ma moni anbi athoes?

¹⁴Kais mipoitan uab-uab maufinu, ma kais hi moni anbi lasi kake'.

¹⁵Mi'lo mi'ko maufinu, ma mo'e alekot, ma nok hi be'im hi matanim so hi mami lasi halan.

¹⁶UISNENO mes anpanat atoni nek muti', In nen sin onen totis hen tuntaku sin.

¹⁷Mes In of anlaban atoni le anmo'e maufinu; leka sin anmate, sin manikan labah.

¹⁸UISNENO In nen leka atoni nek muti' sin an onen, ma In mes nafetin sin na'ko sin as'unu.

¹⁹UISNENO anhaumak atoni nek amnebet; In mes namepan sin leka sin anbi afnekan.

²⁰Atoni nek amneot in ma'ne'at nane naek, mes UISNENO nafetin sin na'kone.

²¹UISNENO mes anpanat in aon, na'ko in nuif sin mes ka nat'ipu nit fa mese amsa'.

²²Atoni amaufinut in mes anmate natuin in maufinu, atoni le in nek nanan atoni nek muti' mes napeni kasat.

²³UISNENO nafetin In ate sin; ma sekau le nem neu In mes In nafetin sin.