Read Uab Meto SIT PULES 35 Bible Online

SIT PULES 35 - Uab Meto bible

SIT PULES 35

¹Sit Pules Nai Daud. Koi UISNENO, amlaban atoni le anlaban kau, amaken mok atoni le anmaken nok kau.

²Maiti Ho auni ma Ho ben aninit, ma amfen nai hem tuntaku kau.

³Maiti Ho auni ma amlaban atoni le anli'u kau. Miton neu Kau mak Ho au afetin.

⁴Maut he nati' atoni le he na'mate kau in naen ma namaebon. Maut he nati' atoni le sin nabua ma anlaban kau sin naskotun nok nek as'unu'.

⁵Maut he nati' ahake UISNENO, anli'u sin ma sin nasitbok onle' anin anfu aen ut.

⁶Maut he nati' ahake UISNENO, anli'u sin anbi lanan le names'ok ma maeki.

⁷Sin antao habi neu kau ka nok fa sa'-sa' ma anhani bola' he nati' anheke kau.

⁸Maut he nati' sin antoman amle'ut le sin ka natenab nit fa. Maut he nati' sin maheke anbi sin habi anmes kun ma sin anmofu ma anmaten.

⁹Mes natuin UISNENO au mes u'ba', ma au nekak namlil natuin In nafetin kau.

¹⁰Nok au nekak oke au u'naeb ak, “UISNENO, ka tit fa esle' namnes nok Ko! Ho mufetin a'olet sin na'ko abe'it sin, ma amamu'it sin ma amanukat sin na'ko a'susu'.”

¹¹Amaufinut sin saksi anfen ma anlaban kau, ma sin natan kau neu lasi le au ka uhin fa.

¹²Sin anseun banin au alekot neki maufinu; au le anbi au as'unu in nanan.

¹³Leka sin antoman menas, au ususbok ma ka uah fa; au utesa au nakak ma au onen,

¹⁴onle' au onen neu au olif ma au tataf ma au sob leko. Au tesan au nakak ma au kae natuin sin, namnes onle' au kul ma kae neu au aina anmes kun.

¹⁵Mes leka au ususbok, sin anmalinan, ma sin anfun natef hen laban kau, sin anse'el ma na'si'u kau.

¹⁶Sin na'si'ut atoni a'olet piut, ma sin ankius kau nok to'as.

¹⁷Talantia leka, koi UISNENO, antia leka anteni al Hom kiso kau? Mufetin kau na'ko sin kenat, mufetin au smanak na'ko meo asu sin le nane.

¹⁸Es nanet au mes u'naeb Ko anbi Ho to sin nanan, ma au pules uliatas Ho kanam anbi sin buat.

¹⁹Kais amkolan kau he nati' atoni le namusu nok kau. Sin namaeb kau nok son-sona ma kais mufetin atoni le nato'an kau he sin na'ba' kau son-sona.

²⁰Sin ka na'uab fa nok nek mahoe; mes sin natenab poi neu atoni le anmoni nok halan nekaf.

²¹Sin na'ba' kau ma nak sin nit nalali au toas au mo'et.

²²Mes Ho kum, UISNENO, Ho mit mulali; es nanet kais Hom ta'an kau, koi UISNENO, kais Ho muloel mu'ko kau.

²³Amfen he mufetin kau na'ko au lasi; koi au Uisneno, ma au UISNENO, amtuntaku kau.

²⁴Ampesi mok kau, natuin Ho amneot Ko, koi UISNENO, kais amkolan au musu sin he na'ba' kau.

²⁵Kais amkolan sin he na'uab anbi sin nekan nanan nak, “Alekot mese, natuin hit tasopu tani sin monin. Hit salit natiabon nalali!”

²⁶Maut he atoni le namlil natuin nit au ma'ne'at sin nekan na'oinsok ma namaebok. Maut he nati' atoni le namoko sin aon na'si'u ma namaeb sin.

²⁷Maut he nati' atoni le nit neu Ho mumneob kau sin na'ba' nok malinat. Ma nati' sin na'uab anteni nak, “Namneo UISNENO In apinat kun! In anlomi he In ate napeni honis!”

²⁸Es nanet au mes uton Ho amneot, ma mes au pules Ko anbi au neno monit.