Read Uab Meto SIT PULES 36 Bible Online

SIT PULES 36 - Uab Meto bible

SIT PULES 36

¹Neu atopu sit sin. Na'ko Nai Daud, ate UISNENO.

²Sanat na'uab anbi atoni amaufinut in nekan, in kan mu'i nit fa amtaus neu Uisneno ma in antite UISNENO.

³In natenab nak in aon es naleko' nesi, in natenab nak Uisneno ka nit fa in sanat.

⁴In uab sin nahenu nok amle'ut ma poi, in kan mo'e fa alekot ma nek hinet.

⁵Anbi in hala tupa' in natenab bulalu; anbi in mo'et kan mu'i fa alekot, ma in kan tite' fa amle'ut amsa'.

⁶UISNENO, Ho manekam nane amnanun on neno, ma Ho matakum a'ki'at nane antia nope in fafon.

⁷Ho alekot nane amnanun on atubu, ma Ho amneot nane in amnanun on tasi uf; koi UISNENO, Ho es ampanat kum mansian ma mu'it.

⁸Ho manekam nane in upan nae le'uf kun, koi Uisneno, anbi Ho ninem in mafon mansian naneo ma nahaofton.

⁹Sin namsen nok mnahat le nathoe anbi Ho Ume, ma amninut na'ko Ho noe neki halinat.

¹⁰Ho uf amonit Ko neu ale amonit, anbi Ho meusinem hai mit meusine.

¹¹Nati' Hom nek atoni le nahin Ko ma anmo'e alekot neu atoni nek muti'.

¹²Kais amkolan atoni neka' moko hen ken kau, ai atoni maufinu hen li'uf kau.

¹³Amkiso nai, atoni amaufinut sin natsel nalali, sin anmofun ma kan fenan teni fa.