Read Uab Meto SIT PULES 38 Bible Online

SIT PULES 38 - Uab Meto bible

SIT PULES 38

¹Sit Pules Nai Daud leka in na'tulu' fua tulu' amnaut.

²UISNENO, kais amkas kau anbi Ho to'as in nanan, ma kais Hom aten kau anbi Ho maunu in nanan.

³Ho as'anef napisu ma napapa' au aok, ma Ho nukum na'meku kau ma'fena.

⁴Au umen a'naek natuin Ho to'as, kau mu'i fa aomina anbi au aok natuin au sanat sin;

⁵Au lem anbi au sanat in nanan, au baut sanat ma'fen le'uf neu kau.

⁶Au papa' sin na'oen ma nafon, natuin au mo'et on atoni amonot.

⁷Au u'luli ma au luin, neno teme mese au unukbok ma ususbok.

⁸Men maputu' notu au aok, kan mu'i fa aomina anbi au nanak.

⁹Au aok naklati ma au ulali nenuf, au unoi natuin au nekak nas'unu.

¹⁰UISNENO, Ho muhin au salit, au sakoit ka na'tolo' fa neu Ko.

¹¹Au tekak naletbon, ma au nenuk namneku, ma au matak namsab.

¹²Au bia-benu sin na'lo kau natuin au menas, ma au sob leko sin amsa' na'lo kau;

¹³Atoni le anlomi he na'mate kau antao kleot neu kau, ma sin le he nale'un kau na'uab amle'ut he natselab kau.

¹⁴Mes au onle' atono le ka nen fa, onle' atoni amonot le ka u'uab uhin fa.

¹⁵Namneo, au onle' atoni le ka nen fa, es nanet au ka matoe fa.

¹⁶Mes au futun au nekak neu Ko, koi UISNENO, ma Ho, au UISNENO, Ho es mutae kau.

¹⁷Kais mufetin au musu sin hen malin leka sin nit au nukat, kais nufetin sin na'uab poi leka au mofu.

¹⁸Ala kle'ot au utsel, au umen piut-piut.

¹⁹Ale au sanat sin au au sin; ma au nekak naklati leka au utenab au elet tanhais sin.

²⁰Sin le namusu nok kau namfau ma anmatani, sin nek nanan au monit.

²¹Atoni le anseun banin alekot neki amle'ut namusu nok kau, natuin au mo'e lasi alekot.

²²Koi UISNENO, kais musaitan kau, kais mu'lo mu'ko kau, koi Uisneno.

²³Amu labah he nati' amtuntaku kau, koi UISNENO, au afetin.