Read Uab Meto SIT PULES 4 Bible Online

SIT PULES 4 - Uab Meto bible

SIT PULES 4

¹Neu atopu sit sin. Nok a'bae heo ma biol. Sit Pules Nai Daud.

²Koi Uisneno, Hom au afetin; mutae kau leka au boin Ko. Leka au ususbok, Hom tuntaku kau; tabu le i amnek Ho ate kau ma mutnin au onen totis.

³Koi ale mansian, neno leka anteni hi mile'uf au Uisneno? Him lomi lasi le ka maota' anteni fa leka anteni ma minoina lasi le ka namneo fa?

⁴Mihin nai, natuin UISNENO anbeti nalali neu In atoni le In nek nani. UISNENO In nen kau leka au toti neu In.

⁵Amlilitai nai ma mimtau nai ma kais misanab amteni. Mimne ma mitenab nai, leka him tup anbi hi hala tupa'.

⁶Mitulu fuat amneot ma ampalsai nai neu UISNENO.

⁷Atoni amfaun natan nak, “Sekau es mes anfe anfe tetus neu kit?” So nati' Hom nen kai, koi UISNENO.

⁸Hom halin au nekak anesin atoni le anseki naek.

⁹Es nanet nok tainine au tup anbi au hala, natuin al Ho, UISNENO, Ho es anmo'e teneb au monik!