Read Uab Meto SIT PULES 40 Bible Online

SIT PULES 40 - Uab Meto bible

SIT PULES 40

¹Neu atopu sit sin. Sit Pules Nai Daud.

²Nok neka' none au pao babat UISNENO, ma In antae kau ma In nen au sakoit.

³In antopu kau na'ko bola' maten, ma na'ko klofo in nanan. In natokob kau neu tub fatu in tunan, talantia au lak nok alekot.

⁴In nanoina' kau sit fe'u es, sit pules neu hit Uisneno. Atoni namfau sin ni ma namtau, ma anpalsai neu UISNENO.

⁵Ua alekot neu atoni le nafnek neu UISNENO, ma le ka nok na'usi fa neu fatu le'u ma hau le'u, ai kan toti fa tuntakus na'ko atoni neka' naeb.

⁶Ho mepu sin neu kai namfau, koi au UISNENO, ka tit fa es he namnes nok Ko. Ho salit sin namfau le neki amkakat neu kai, au ka etun ube'i sin fa.

⁷Au ka lomi fa tulu' fuat ma tulu' mnahat, fua mnotu ma fuat neu sako sanat nane es au toti ani. Mes Ho amfe mulali kau lukef he nati' au nen Ho hanam.

⁸Nalali te au u'uab ak, “Au es kau i, anbi sulat le manunu Hom tui mulali neu kau.

⁹Au lomi he mo'e ani Ho lomim, koi Uisneno, au tao ma mo'e Ho plenat sin anbi au nekak.”

¹⁰Anbi Ho to knino sin buat au etun ma uton beno alekot ak Ho mufetin mulali kai. Au etun ma uton lasi, nane ka usnasab, koi UISNENO.

¹¹Ho beno alekot nane au ka ta'an sin fa anbi au nekak, Ho tuntakus ma Ho a'ki'at au etun ma utonan piut. Anbi Ho to knino sin buat ma sin matan au ka ta' fa, mes au etun ma uton Ho manekam ma Ho a'ki'at.

¹²Koi UISNENO, Ho manekam nane kais anfinin kau; muneo ma muhafo kau meki Ho manekam ma Ho matakum.

¹³Amle'ut anfun natef kau, sin amfaun kat so'i tabe'i fa. Au sanat sin na'aten kau talantia au kiso ka it fa. Sin amfaun nane an nesin nakak funun anbi au nakak, es nanet anmo'e kau talantia au u'sunu.

¹⁴Koi UISNENO, mufetin kau, amu labah, koi UISNENO he nati' amtuntaku kau!

¹⁵Maut he nati' atoni le he na'mate kau anbe'u ma naen nok neka' mneku. Maut he nati' atoni le na'ba' neu au lasi susal sin masi'uk ma naskotun kau.

¹⁶Maut he nati' atoni le anmanis kau sin naskeken ma anmae.

¹⁷Nati' atoni le na'luli ma na'bes neu Ko sin namlil ma na'ba', ma ale sin nek honis le Hom fe na'uab piut nak, “Namneo UISNENO nane naek kun!”

¹⁸Au anukat ma a'olet kau, mes UISNENO Ho es muloitan kau. Ho es atuntakus ma afetin, es nanet kais mu'nea'om, koi Uisneno!