Read Uab Meto SIT PULES 41 Bible Online

SIT PULES 41 - Uab Meto bible

SIT PULES 41

¹Neu atopu sit sin. Sit Pules Nai Daud.

²Ua alekot neu atoni le anpanat atoni a'olet; UISNENO mes antuntaku sin leka sin nas'unu.

³UISNENO mes naneo nahafo ma anpanat in, In mes anfe neu sin athoes anbi pah pinan, ma mes ka nana'at fa sin neu musu in niman.

⁴UISNENO mes anpaloli in leka in anmofu anbi menas, ma mes anfe neune ua leko.

⁵Au ak, “Au usanab ulali neu Ko, koi UISNENO, amnek mumnau kau ma muleko' kau na'ko au menas.”

⁶Au musu sin na'uab amle'ut neu kau, sin anmalomin he au mate ma manikan kau.

⁷Atoni-atoni le anseun kau ka nok fa nek muti'. Sin na'uab uab amle'ut neu kau, ma sin etun ma naton neu me-me.

⁸Alsin le sin nek nanan kau sin na'uab nok a'seof; ma sin ansali amle'ut neu kau.

⁹Sin na'uab nak, “Menas anaek antoman in, ma in mes kan fen anteni fa.”

¹⁰Talantia au sob leko le anfutnok neu sin, ma atoni le nah nabua nok kau sin na'si'u kau.

¹¹Amnek mumnau kau, koi UISNENO, muleko' kau na'ko au menas, he nati' au seun banin maufinu na'ko sin le anlaban kau.

¹²Bait au musu sin ka namaeb kau, fa au uhin neu Hom tom nek kau.

¹³Hom tuntaku kau natuin au umneo, ma au moni ubua ok Ko talantia nabal-bal.

¹⁴Pules UISNENO, Israel! Pules In na'ko tabu le i talantia nabal-bal! Maut he nati' anbol onane! Amin!