Read Uab Meto SIT PULES 44 Bible Online

SIT PULES 44 - Uab Meto bible

SIT PULES 44

¹Sit Pules na'ko Nai Korah in anmone sin. Sit knino noina. Neu atopu sit sin.

²Koi Uisneno, haim mese amnen milalien, etus tonas na'ko hai na'i ba'i ma ha'i antom mepu naek le Ho mo'e mulali, neu sin anbi batan ahunut.

³Ho es amli'u ale uf-uf he nati' Ho to sin natua nabalah anbi sin pah. Ho mule'un mani ale uf-uf, mes Ho nonot sin Ho mufetin sin he nati' sin antu'an piut.

⁴Sin ka nis nan fa pah nane neki suni; ma sin ka nis fa neki sin be'it, matani mes nok Ho kuasat ma Ho matakum, natuin Hom nek sin.

⁵Ho au Kesel ma au Uisneno, le Hom fe mnisat neu Ho to.

⁶Hom be'u hai musu sin meki Ho kuasat, Ho mutseleb atoni-atoni le anmaken nok kai.

⁷Natuin au ka ufnek fa neu au as'anef, au suni amsa' ka nafetin kau fa.

⁸Mes Ho es mufetin kau na'ko au musu sin, ma Ho es mumaeb atoni-atoni le nato'an kau.

⁹Es nanet hai mes miusi meu Ko, ma minaeb Ko piut-piut.

¹⁰Mes tabu le i Ho musaitan kai ma Ho mufetin kai talantia hai mae. Ho kam nao amteni fa mok kai.

¹¹Ho mufetin kai talantia hai maen mi'ko hai musu sin, ma sin nasik nan hai mu'im.

¹²Ho muna'at kai ma sin anlolo kai onle' bibi kase, ma Ho mupe' kai ma musiteb kai na'ko ale uf-uf.

¹³Ho mu'sosa' mani Ho to nok upa' kle'o, ma Ho ka mupeni fa in sufan.

¹⁴Hai aon bian sin na'akan kai sin na'si'u kai ma na'le'uf kai.

¹⁵Ho mo'e kai talantia uf-uf na'si'ut kai, sin anki'un sin nakan ma nakle'at kai.

¹⁶Sin na'si'u kai anbi neno teme, haim sutai mae ma hai humam namneku.

¹⁷Natuin haim nen akan ma kle'at na'ko hai musu sin fefan le an unto'an neu kai.

¹⁸Ale lasi nane haim sutai maski nak hai kam nikan fa ma hai ka mitotan fa Ho fef bela mok kai.

¹⁹Hai ka mitotan Ko fa anbi hai nekam; ma hai ka misaitan fa Ho plenat sin.

²⁰Mes Ho mufetin kai anbi mes'okan in nanan; talantia hai ka mine'o fa anbi meo asu sin atnanan.

²¹Bait hai ka miluli mibes fa neu Uisneno, mes haim onen neu uisneno teta.

²²Uisneno namneo In mes nahin, natuin In nahine lasi tolo' le anbi hai nekam.

²³Natuin Ho, maten an amu kai, ma anmo'e kai onle' bibi kase le he malolo.

²⁴Amfen nai, koi UISNENO! Nansa' es Hom tup? Amfen nai! Kais amtite kai talantia nabal-bal.

²⁵Nansa' es Ho mu'tol'om, ma Hom nikan hai ma'ne'at ma hai nu'ut?

²⁶Hai mitsel ma mimnoe anbi nain, hai amtup anbi afu in nanan natuin anli'u na'aenab kai.

²⁷Amfen ma amu nai he nati' amtuntaku kai, mufetin kai natuin Ho manekam.